កំពត៖ នៅថ្ងៃទី២៦ ខែមីនា ឆ្នាំ២០២៣នេះ លោកជំទាវ ពេជ ចន្ទមុន្នី ហ៊ុន ម៉ាណែត ប្រធានមូលនិធិអណ្តូងទឹកស្អាត អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក រួមទាំងក្រុមការងារ បានបន្តអញ្ជើញប្រគល់អណ្ដូងទឹកស្អាតចំនួន៥ ជូនដល់ប្រជាពលរដ្ឋ រស់នៅឃុំអង្គរមាស ស្រុកដងទង់ ខេត្តកំពត។

ក្នុងឱកាសជួបសំណេះសំណាលជាមួយប្រជាពលរដ្ឋអាស្រ័យផលនៃអណ្តូងទឹកទាំងអស់ លោកជំទាវប្រធានមូលនិធិ បានមានប្រសាសន៍ថា អណ្តូងទឹកទាំងនេះ រួមមាន អំណោយរបស់​អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង ​និងមហាឧបាសិកា ឌី ប៉ុក ឪពុកម្តាយបង្កើត​សម្តេចតេជោ ហ៊ុន សែន ចំនួន២ និងអំណោយរបស់​អ្នកឧកញ៉ាព្រឹទ្ធមហា​ឧបាសិកា​ធម្មញ្ញាណ​វិវឌ្ឍនា ប៊ុន ស៊ាងលី និងឧបាសក លីន គ្រី ឪពុកម្តាយបង្កើតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនចំនួន៣ ផ្ដល់ជូនលោកយាយ​ លោកតានៅទីនេះ ប្រើប្រាស់ជាផ្លូវការចាប់​ពីពេលនេះតទៅ។

នៅតាមទីតាំងប្រគល់អណ្ដូងទឹកនីមួយៗលោកជំទាវ ប្រធានមូលនិធិ បាននាំនូវការផ្ដាំផ្ញើសួរ​សុខទុក្ខ ​ពីសំណាក់សម្ដេចតេជោ ​ហ៊ុន សែន​ និង​សម្ដេចកិត្តព្រឹទ្ធបណ្ឌិត ប៊ុន រ៉ានី ​ហ៊ុនសែន ជូនចំពោះបងប្អូន​ប្រជាពលរដ្ឋទាំងអស់ថា ​សម្តេចទាំងទ្វេរលោកតែងតែគិតគូពីទុក្ខលំបាក​របស់ប្រជាពលដ្ឋទូទៅ ​នៅគ្រប់ទីកន្លែង។ ពិសេសការផ្តល់អណ្តូងទឹកស្អាតនាពេលនេះ គឺជាការរួមចំណែកលើកកម្ពស់សុខមាលភាព និងជីវភាពរបស់ប្រជាពលរដ្ឋ នៅតាម​ទីជនបទអោយមានជីវភាពល្អប្រសើរ និងមានសុខភាពល្អ។

លោកជំទាវបន្តថា គិតមកដល់ពេលនេះ ក្រុមការងារបានចុះប្រគល់អណ្តូងទឹកស្អាត ជូន​ប្រជាពលរដ្ឋបានប្រើប្រាស់ជាផ្លូវការជាង១០ឆ្នាំមកហើយ ​នៅទូទាំងប្រទេស ហើយក៏នៅ​សល់អណ្តូងទឹកជាច្រើនទៀត គ្រប់ខេត្តក្រុងទាំងអស់ ​ដែលកំពុងរង់ចាំលោកជំទាវ ចុះធ្វើពិធី​ប្រគល់​ទទួលជាបន្តបន្ទាប់ទៀតផងដែរ។

លោកជំទាវបន្តថា ដើម្បីអោយការប្រើប្រាស់ នៃអណ្តូងទឹកទាំងនេះបានយូអង្វេង​ សូមលោកយាយ លោកតា បងប្អូន ដែលអាស្រ័យផលអណ្តូងទឹកទាំងអស់ រួមគ្នាថែរក្សាអណ្តូងនេះទាំងអស់គ្នា ដើម្បីជាប្រយោជន៍រួមនៅក្នុងសហគម។

ប្រជាពលរដ្ឋដែលទទួលផលពីអណ្តូងទឹកស្អាតទាំងអស់ បានថ្លែងអំណរគុណយ៉ាងជ្រាលជ្រៅបំផុត ចំពោះម្ចាស់​អំណោយ​ខាងលើជាពិសេសសម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ដែលតែងតែគិតគូរដល់ជីវភាពរស់នៅ​ របស់ប្រជាពលរដ្ឋគ្រប់ទិសទី ដែលត្រូវការចាំបាច់នូវ​ទឹកស្អាត​ប្រើប្រាស់ប្រចាំថ្ងៃ៕ អត្ថបទ៖ សំ ងីម