​ស្នូកឃ័រ៖ ​ជើងឯក​រង​ស្នូកឃ័រ​ជើងឯក​ពិភពលោក Kyren Wilson បាន​នាំមុខ Shaun Murphy ៦-២ហ្វ្រេ​ម​ក្នុង​ដំណាក់​កាល​ដំបូង​ នៃ​ការប្រកួត​វគ្គ​ពាក់កណ្តាល​ផ្តាច់ព្រ័ត្រ​ជើងឯក​ពិភពលោក​។

​​Kyren Wilson បាន​បន្ត​ទំរង់​លេង​អស្ចារ្យ​របស់ខ្លួន​ដោយបាន​យកឈ្នះ ៥ហ្វ្រេ​ម​ជាប់​គ្នា​តាម​រយៈ​ការ​វាយ​មួយ​ឈើ​បាន ១១០ពិន្ទុ, ៧២ពិន្ទុ, ១២៧ពិន្ទុ និង ១២១ពិន្ទុ មុន​ពេល​ដែល Shaun Murphy វាយ​មួយ​ឈើ​បាន ៧៤ពិន្ទុ និង ៧១ពិន្ទុ តាម​ពីក្រោយ​បាន​ពីរ​ហ្វ្រេ​ម​វិញ​តែ Wilson ក៏​តប​បាន​មួយ​ហ្វ្រេ​ម​ទៀត ៧០ពិន្ទុ​។ ​ចប់​ដំណាក់កាល​ដំបូង Kyren Wilson នាំមុខ​លើ Shaun Murphy ៦-១​ហ្វ្រេ​ម​។​ ​​Shaun Murphy ដែល​ឡើង​មកដល់​វគ្គ​នេះ​ បន្ទាប់ពី​ទំលាក់​កីឡាករ​លេខ ១ ពិភពលោក Judd Trump នោះ​បែ​ជា​លំបាក​ពេល​ជួប Kyren Wilson​។

​​ចំណែក​ការប្រកួត​វគ្គ​ពាក់កណ្តាល​ផ្តាច់ព្រ័ត្រ​មួយគូ​ទៀត ​ជើងឯក​ពិភពលោក ៣សម័យ Mark Selby កំពុងតែ​តានតឹង​ជាមួយ​ជើងឯក​ឆ្នាំ២០១៥ Stuart Bingham ក្រោយ​ស្មើគ្នា ៤-៤ហ្វ្រេ​ម​។​ ​​Selby បាន​នាំ​មុខមុន ៤-១ហ្វ្រេ​ម​មុនពេល Bingham ឈ្នះ ៣ហ្វ្រេ​ម​ជាប់​គ្នា​ដើម្បី​តាម​ស្មើ​។ ​វគ្គ​ពាក់កណ្តាល​ផ្តាច់ព្រ័ត្រ​នឹង​រកឃើញ​អ្នក​ឡើង​វគ្គ​ផ្តាច់ព្រ័ត្រ​រាត្រី​នេះ ខណៈ​វគ្គ​ផ្តាច់ព្រ័ត្រ​នឹងធ្វើ​ឡើង​នៅ​ថ្ងៃអាទិត្យ​៕

​អត្ថបទ​៖​នាង សុភា​វុ​ធ