ភ្នំពេញ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភាបានទទួលឯកឧត្តម ដាតុ ស៊េរី អាន់វ៉ា ប៊ីន អ៊ីប្រាហ៊ីម (Dato' Seri Anwar bin Ibrahim ) នាយករដ្ឋមន្រ្តី នៃប្រទេសម៉ាឡេស៊ី ចូលជួបសម្តែងការគួរសម នារសៀលថ្ងៃទី២៧ ខែមីនា ឆ្នាំ២០២៣ ក្នុងឱកាសដែលឯកឧត្តមនាយករដ្ឋមន្ត្រី ដឹកនាំគណៈប្រតិភូអញ្ជើញម​កបំពេញ​ទស្សនកិច្ច​ជាផ្លូវការ​នៅព្រះរាជាណាចក្រកម្ពុជា។

​សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានបង្ហាញនូវសេចក្តី​រីករាយ​យ៉ាង​ក្រៃលែងដោយមើលឃើញរដ្ឋាភិបាលកម្ពុជា និងម៉ាឡេស៊ីមានកិច្ចសហប្រតិបត្តិការយ៉ាងល្អ ទំាងក្រប​ខណ្ឌ​ទ្វេភាគី​ ក៏ដូចជាក្នុងក្របខ័ណ្ឌតំបន់ និងអន្តរជាតិតាំងពីដើមរហូតដល់បច្ចុប្បន្ន។

នៅក្នុងកិច្ចជំនួបពិភាក្សាទ្វេភាគីជាមួយ ឯកឧត្តម ដាតុ ស៊េរី អាន់វ៉ា ប៊ីន អ៊ីប្រាហ៊ីម (Dato’ Seri Anwar bin Ibrahim) នាយករដ្ឋមន្ត្រី នៃប្រទេស ម៉ាឡេស៊ី នៅរសៀលថ្ងៃទី២៧ ខែមីនា ឆ្នាំ២០២៣នេះ នៅវិមានរដ្ឋសភា សម្តេចហេង សំរិន បានលើកឡើងថា ដំណើរទស្សនកិច្ចរបស់ឯកឧត្តមនាយករដ្ឋមន្រ្តីម៉ាឡេស៊ី នឹងធ្វើឱ្យចំណងមិត្ត​ភាព​កម្ពុជា-ម៉ាឡេស៊ី ដែលមានជាង៦០ឆ្នាំមកនេះកាន់តែរឹងមាំថែមទៀត ហើយសម្តេចប្រធានរដ្ឋសភា មាន​សេចក្តី​រីករាយក្រៃលែងដោយសងេ្កតឃើញថា រដ្ឋាភិបាលទាំងពីរមានកិច្ចសហប្រតិបត្តិការយ៉ាងល្អ ទំាងក្របខណ្ឌ​ទ្វេភាគី ក៏ដូចជាក្នុងក្របខ័ណ្ឌតំបន់ និងអន្តរជាតិ ។ ដោយឡែកស្ថាប័ននីតិប្បញ្ញត្តិនៃប្រទេសទាំងពីរក៏បានធ្វើកិច្ចសហប្រតិបត្តិការជាមួយគ្នាយ៉ាងច្រើន ក្នុងក្របខ័ណ្ឌ​ទ្វេភាគី និងពហុភាគី។ ក្រៅពីកិច្ចសហប្រតិបត្តិការក្នុងក្របខ័ណ្ឌក្រុមមិត្តភាពរដ្ឋសភា ដើម្បីផ្លាស់ប្តូរបទ​ពិសោធន៍​លើការងារនីតិកម្ម រដ្ឋសភាទាំងពីរក៏បានគាំទ្រគ្នាទៅវិញទៅមក លើវេទិកាអន្តរសភានានាទាំងក្នុងតំបន់ និង​សកលលោកផងដែរ។

សម្តេច ហេង សំរិន បានលើកឡើងទៀតថា ក្នុងនាមរដ្ឋសភាកម្ពុជាសម្តេច មានសេចក្តីសោមនស្សរីករាយ និង​បានស្វាគមន៍យ៉ាងកក់ក្ដៅចំពោះ ឯកឧត្តមនាយករដ្ឋមន្រ្តី និងគណៈប្រតិភូទំាងអស់​ដែលបាន​មកបំពេញ​ទស្សនកិច្ច​នៅកម្ពុជា ខណៈដំណើរទស្សនកិច្ចនេះ នឹងរួមចំណែកបន្ថែមទៀត ក្នុងការពូនជ្រុំលើកកម្ពស់ទំនាក់ទំនង មិត្តភាព និងកិច្ចសហប្រតិបត្តិការដ៏ល្អ រវាងប្រជាជាតិទាំងពីរ ដែលមានជាង៦ទសវត្សមកនេះ ឱ្យកាន់តែរឹងមាំ​ខ្លាំងក្លាថែម​ទៀតផងដែរ។

ថ្លែងនៅក្នុងកិច្ចជំនួបនោះដែរ ឯកឧត្តម ដាតុ ស៊េរី អាន់វ៉ា ប៊ីន អ៊ីប្រាហ៊ីម បានថ្លែងអំណរគុណ​ចំពោះសម្តេ​ច​ប្រធានរដ្ឋសភា ​ដែលបានទទួលស្វាគមន៍​ និងបដិសណ្ឋារកិច្ចយ៉ាងកក់ក្តៅដល់គណៈប្រតិភូ។ ឯកឧត្តមបានគូសបញ្ជាក់ថា ដំណើរទស្សនកិច្ចរបស់ឯកឧត្តមនាពេលនេះ នឹងចូលរួមចំណែកដល់​ការពង្រឹងពង្រីក​កិច្ចសហប្រតិបត្តិការប្រទេសទំាងពីរ ទំាងខាងស្ថាប័ននីតិប្បញ្ញត្តិ និងនីតិប្រតិបត្តិ៕