​បាល់​បោះ៖ ​កីឡាករ​អាមេរិក LeBron James បាន​វិល​ពីស​ម្រាក​ព្យាបាល​របួស​ដែល​បាន​អវត្តមាន​អស់ ១៣ប្រកួត តែ​ត្រលប់​មកវិញ​មិនអាច​ជួយ Los Angeles Lakers គេច​ពី​បរាជ័យ​បានឡើយ ក្រោយ​ចាញ់​ក្រោម​ស្នាដៃ Chicago Bulls ១១៨-១០៨​។

​​កីឡាករ​វ័យ ៣៨ឆ្នាំ​រូបនេះ​បោះ​បាន ១៩ពិន្ទុ និង​បាន​បញ្ជាក់ថា​ខ្លួន​មាន​បញ្ហា​របួស​ជើង​ខាងស្តាំ​។​ ​កីឡាករ Zach LaVine បោះ​បាន ៣២ពិន្ទុ​ក្នុង​ជ័យជំនះ​លើក​ទី៧ របស់ Chicago Bulls ក្នុង ៩ ប្រកួត​ចុងក្រោយ​។ ​បរាជ័យ​នេះ​ធ្វើឱ្យ LA Lakers ធ្លាក់​ទៅ​លេខ ៩ នៅ​ភាគ​ខាងលិច ស្របពេល​រដូវ​កាល​វិលជុំ​នឹង​បញ្ចប់​នៅ ៧ ប្រកួត​ទៀត​ប៉ុណ្ណោះ ស្រប​ពេលដែល Chicago Bulls នៅ​ឈរ​លេខ ១០ នៅ​ភាគ​ខាងកើត​។ ​ងាក​មក​ការប្រកួត​ផ្សេងទៀត Cleveland Cavaliers បាន​យកឈ្នះ Houston Rockets ១០៨-៩១ ធានា​កៅអី​នៅ​វគ្គ Play-Off NBA លើកដំបូង​តាំងពី LeBron James ចាកចេញ​។ Jarrett Allen បោះ​បាន ២៤ ពិន្ទុ ១៤បាល់​រី​បោ​ន ស្រប​ពេលដែល Donovan Mitchell បោះ​បាន ២២ ពិន្ទុ​ផងដែរ​សម្រាប់ Cleveland​។

​​ចំណែកឯ​ក្រុម​ការពារ​តំណែង​ជើងឯក Golden State Warriors បាន​រង​បរ​ជ័យ​ក្រោម​ស្នាដៃ Minnesota Timberwolves ដោយ​លទ្ធផល ៩៩-៩៦ យ៉ាង​តានតឹង​។ ​Karl-Anthony Towns បោះ​បាន ១៤ ពិន្ទុ ៥ បាល់​រី​បោ​ន​សម្រាប់ Timberwolves ក្នុង​ការចូល​លេង​ដំបូង​តាំងពី​អវត្តមាន​អស់ ៥២ ប្រកួត​ដោយ​សារ​របួស​។ ​Warriors ក៏មាន​ឱកាស​តាម​នៅ​ចុង​ម៉ោង​ដែរ​តែ Stephen Curry មិនអាច​សម្រេចបាន ធ្វើឱ្យ Golden State បញ្ចប់​ស្ថិតិ​ឈ្នះ ៩ ប្រកួត​ជាប់​គ្នា​។ ​ក្រុម​ទាំងពីរ Golden State និង Minnesota កំពុង​ឈរ​ចំណាត់ថ្នាក់​លេខ ៦ និង​លេខ ៧ នៅ​ភាគ​ខាងលិច​ជាមួយគ្នា​ប្រកួត​ឈ្នះ ៣៩ ចាញ់ ៣៧ ដូចគ្នា​៕

​អត្ថបទ​៖​នាង សុភា​វុ​ធ