ភ្នំពេញ៖ រដ្ឋមន្ត្រីក្រសួងពាណិជ្ជកម្ម ឯកឧត្ដម ប៉ាន សូរស័ក្តិ បានស្នើទៅប្រមុខរាជរដ្ឋាភិបាល សម្ដេចតេជោ ហ៊ុន សែន សម្រេចលើវិធានការ នាំចូលសាច់បង្កកពីប្រទេសឥណ្ឌា ខណៈដែលប្រទេសនេះ កំពុងប្រឈមខ្លាំងនឹងការឆ្លងរីករាលដាលនៃមេរោគកូវីដ-១៩បន្លែងខ្លួនថ្មី។
ក្នុងលិខិតផ្ញើជូនទៅសម្ដេចតេជោ ហ៊ុន សែន កាលពីថ្ងៃម្សិលមិញនេះ រដ្ឋមន្ត្រីក្រសួងពាណិជ្ជកម្ម ឯកឧត្ដម ប៉ាន់ សូរស័ក្តិ បានស្នើសុំគោលការណ៍សម្រេចលើការឃាត់ទុកទំនិញដែលនាំចូលប្រទេសកម្ពុជា និងផ្អាកនាំចូលជាបណ្ដោះអាសន្ននូវការនាំចូលសាច់បង្កក និងមុខទំនិញបង្កកដែលនាំចូលមកពីប្រទេសឥណ្ឌា។
ឯកឧត្ដមរដ្ឋមន្ត្រីពាណិជ្ជកម្ម ក៏បានស្នើសុំគោលការណ៍សម្រេចពីសម្ដេចប្រមុខរាជរដ្ឋាភិបាល ជុំវិញការបង្កើតគណៈកម្មការចំពោះកិច្ចមួយសម្រាប់ស្រាវជ្រាវ និងត្រួតពិនិត្យមេរោគកូវីដ-១៩នៅលើផលិតបង្កក ដែលនាំចូលពីប្រទេសឥណ្ឌាផងដែរ។
ក្រសួងពាណិជ្ជកម្មបានស្នើសុំគោលការណ៍បែបនេះពីសម្ដេចតេជោ ហ៊ុន សែន បន្ទាប់ពីកម្ពុជាបានសម្រេចហាមឃាត់អ្នកដំណើរទាំងអស់ធ្វើដំណើរមកពី ឬឆ្លងកាត់ប្រទេសឥណ្ឌា មិនឱ្យចូលប្រទេសកម្ពុជាជាបណ្ដោះអាសន្នសិន ដោយសារតែការឆ្លងរីករាលដាលនៃមេរោគកូវីដ-១៩ទម្រង់ថ្មី B1617 កំពុងផ្ទុះឡើងខ្លាំងនៅក្នុងប្រទេសឥណ្ឌា។
តួលេខចេញដោយអង្គការសុខភាពពិភពលោកកាលពីថ្ងៃទី២៩ ខែមេសា បង្ហាញ ឥណ្ឌាមានអ្នកមេរោគកូវីដ-១៩សរុបរហូតដល់ជិត ២០លាននាក់ហើយ ក្នុងនោះមនុស្សដល់ទៅជិត ៣សែននាក់ បានស្លាប់ដោយសារមេរោគផ្លូវដង្ហើមមួយនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
