ភ្នំពេញ៖ ក្រសួងសុខាភិបាលបានប្រកាសពីការរកឃើញមនុស្សដល់ទៅ ៧៣០នាក់ទៀតឆ្លងមេរោគកូវីដ-១៩ ខណៈអ្នកជំងឺកូវីដ-១៩ចំនួន ១៦៩នាក់ទៀត ត្រូវបានព្យាបាលជាសះស្បើយ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបញ្ជាក់ថា ករណីឆ្លងថ្មីដល់ទៅ ៧២៨នាក់ សុទ្ធតែពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ ខណៈ ២ករណីទៀត គឺជាករណីនាំចូលដែលត្រូវបានរកឃើញលើអ្នកដំណើរចូលមកកម្ពុជា។
បើតាមក្រសួងសុខាភិបាល ករណីឆ្លងថ្មីដែលប្រកាសនៅថ្ងៃនេះ ត្រូវបានរកឃើញច្រើនបំផុតនៅរាជធានីភ្នំពេញដែលមានចំនួនរហូតដល់ទៅ ៤៥៤នាក់ បន្ទាប់មកខេត្តព្រះសីហនុរកឃើញអ្នកឆ្លងថ្មីដល់ទៅ ១២៤នាក់ ខណៈដែលខេត្តកណ្ដាលរកឃើញអ្នកឆ្លងថ្មី ១០៧នាក់។
ក្រសួងបានឱ្យដឹងទៀតថា ខេត្តកំពង់ធំរកឃើញអ្នកឆ្លងថ្មី ១៤នាក់ បន្ទាប់មកទៀតគឺខេត្តតាកែវ រកឃើញអ្នកឆ្លងថ្មី ១១នាក់ទៀត ហើយខេត្តព្រៃវែង រកឃើញអ្នកឆ្លងថ្មី ៦នាក់ ខេត្តត្បូងឃ្មុំរកឃើញអ្នកឆ្លងថ្មី ៥នាក់ ខេត្តកំពង់ចាមរកឃើញអ្នកឆ្លងថ្មី ៤នាក់។
ខណៈដែលខេត្តសៀមរាបរកឃើញអ្នកឆ្លងថ្មី ០២នាក់នោះ ខេត្តកំពត ខេត្តស្ទឹងត្រែង និងខេត្តពោធិ៍សាត់ បានរកឃើញអ្នកឆ្លងថ្មី ១នាក់ក្នុងខេត្តនីមួយៗ។
គិតត្រឹមថ្ងៃនេះ កម្ពុជាបានរកឃើញមនុស្សដល់ទៅ ១៤,៥២០នាក់ហើយបានឆ្លងមេរោគកូវីដ-១៩នៅទូទាំងប្រទេសគិតចាប់តាំងពីការរកឃើញករណីឆ្លងលើកដំបូងកាលពីចុងខែមករាឆ្នាំមុន។
បើតាមតួលេខរបស់ក្រសួងសុខាភិបាល អ្នកឆ្លងមេរោគកូវីដ-១៩រហូតដល់ទៅ ១៣ ៩៦៥នាក់ ឬស្មើនឹង ៩៦ភាគរយ សុទ្ធតែពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ។
ក្រសួងសុខាភិបាល ក៏ប្រកាសផងដែរថា អ្នកជំងឺកូវីដ-១៩សរុប ៥ ,៣៦៩នាក់ហើយត្រូវបានព្យាបាលជាសះស្បើយ ក្នុងនោះមានទាំងអ្នកជាសះស្បើយថ្មីចំនួន ១៦៩នាក់ ដែលក្រសួងប្រកាសនៅថ្ងៃនេះផងដែរ ខណៈអ្នកជំងឺកូវីដ-១៩ចំនួន ៩ ០៤០នាក់ទៀត កំពុងស្ថិតក្រោមការព្យាបាលបន្ត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
