តាកែវ៖ រដ្ឋបាលស្រុកបាទី ខេត្តតាកែវ បានអំពាវនាវទៅពលរដ្ឋពាក់ព័ន្ធឱ្យផ្ដល់សំណាក និងតាមដានសុខភាពខ្លួនឯង បន្ទាប់ពីបានរកឃើញពលរដ្ឋ ០៧នាក់ឆ្លងកូវីដ-១៩នៅថ្ងៃនេះ។
ក្នុងសេចក្ដីជូនដំណឹងនៅថ្ងៃនេះ រដ្ឋបាលស្រុកបាទី ប្រកាសថា បុរសជាជនជាតិខ្មែរ ០២នាក់ និងស្ត្រី ០៥នាក់ ដែលរស់នៅក្នុងភូមិនាល នៃឃុំតាំងដួង ភូមិត្រាំខ្នារ នៃឃុំសូរភី ភូមិកញ្ចុំ នៃឃុំកុមាររាជា បានឆ្លងមេរោគកូវីដ-១៩។
ក្នុងចំណោមមនុស្សទាំង ០៧នាក់នោះ រដ្ឋបាលស្រុកបាទី បញ្ជាក់ថា មានកម្មការិនី ០៣នាក់ផងដែរ ដែលបម្រើការនៅរោងចក្រវូណាមី ដែលមានទីតាំងស្ថិតក្នុងស្រុកនេះ។
រដ្ឋបាលស្រុកបាទី បានអំពាវនាវទៅដល់ប្រជាពលរដ្ឋនានាដែលប្រាស្រ័យទាក់ទងនឹងពលរដ្ឋទាំង ០៧នាក់ខាងលើនេះ ឱ្យទៅផ្ដល់សំណាកធ្វើតេស្តរកមេរោគកូវីដ-១៩ និងត្រូវរក្សាខ្លួននៅដាច់ដោយឡែក ដើម្បីតាមដានសុខភាពខ្លួនឯង។
បើតាមរបាយការណ៍របស់ក្រសួងសុខាភិបាល មនុស្សដល់ទៅ ១១៤នាក់ហើយ ត្រូវបានរកឃើញឆ្លងមេរោគកូវីដ-១៩នៅក្នុងខេត្តតាកែវ ក្នុងនោះមានទាំងករណីថ្មី ១១នាក់ ដែលក្រសួងប្រកាសនៅថ្ងៃនេះផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
