ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានចោទជាចម្ងល់ថា តើកីឡាករបាល់ទាត់លំដាប់ពិភពលោក Leonel Messi និង Neymar អាចប្រឈមមុខដល់គ្រោះថ្នាក់អាយុជីវិតទេ ក្រោយពីពួកគេត្រូវចាក់វ៉ាក់សាំងចិននាពេលខាងមុខនេះ។
សម្ដេចតេជោ ហ៊ុន សែន បានចោទជាចម្ងល់បែបនេះនៅលើទំព័រហ្វេសប៊ុកផ្លូវការរបស់សម្ដេចនៅល្ងាចនេះ បន្ទាប់ពីទទួលបានដំណឹងថា កីឡាករលំដាប់ពិភពលោកទាំង ២រូបនេះ នឹងត្រូវចាក់វ៉ាក់សាំងនាពេលខាងមុខ។
ទីភ្នាក់ងារព័ត៌មានចិនស៊ិនហួរ បានផ្សាយកាលពីថ្ងៃម្សិលមិញ ខ្សែប្រយុទ្ធសញ្ជាតិអាហ្សង់ទីន Lionel Messi និងខ្សែប្រយុទ្ធឆ្នើមប្រេស៊ីល Neymar នឹងទទួលបានការចាក់វ៉ាក់សាំងចិនស៊ីណូវ៉ាក់នៅប៉ុន្មានខាងមុខនេះ។
ទីភ្នាក់ងារព័ត៌មានចិន បានចុះផ្សាយបែបនេះដោយផ្អែកទៅតាមការលើកឡើងរបស់ប្រធានសហព័ន្ធបាល់ទាត់តំបន់អាមេរិកខាងត្បូង (CONMEBOL) លោក Alejandro Dominguez ដែលបានលើកឡើងបែបនេះលើ Twitter។
សម្ដេចតេជោ ហ៊ុន សែន បានលើកឡើងបែបនេះ បន្ទាប់ពីក្រុមប្រឆាំងបានធ្វើយុទ្ធនាការអំពាវនាវទៅប្រជាពលរដ្ឋខ្មែរ កុំឱ្យចាក់វ៉ាក់សាំងរបស់ប្រទេសចិន ដោយចាត់ទុកថា ជាវ៉ាក់សាំង«ចាក់សម្លាប់មនុស្ស»។
សម្ដេចតេជោ ហ៊ុន សែន រៀបរាប់ថា៖ «កាលពីមុន ពួកបំផ្លាញជាតិមួយចំនួនបាននិយាយថា វ៉ាក់សាំងចិនចាក់សម្លាប់មនុស្ស នៅពេលដែលខ្លួនខ្ញុំផ្ទាល់បានសម្រេចជ្រើសរើសវ៉ាក់សាំងចិន Sinopharm និង Sinovac មកចាក់ជូនបងប្អូនប្រជាពលរដ្ឋកម្ពុជា ដើម្បីការពារអាយុជីវិតពីជំងឺដ៏កាចសាហាវកូវីដ១៩»។
គិតមកដល់ថ្ងៃនេះ កម្ពុជាទទួលបានវ៉ាក់សាំងស៊ីណូហ្វាមសរុបចំនួន ១.៧លានដូសដែលជាជំនួយរបស់ប្រទេសចិនផ្ដល់មកកម្ពុជាចំនួន ៣លើកជាបន្តបន្ទាប់ ហើយកម្ពុជាក៏ទទួលបានវ៉ាក់សាំងស៊ីណូវ៉ាក់សរុប ២លានដូសផងដែរ ដែលកម្ពុជាបានបញ្ជាទិញពីប្រទេសចិន។
ទាក់ទងនឹងវ៉ាក់សាំងចិនទាំង ២ប្រភេទនេះ សម្ដេចតេជោ ហ៊ុន សែន បញ្ជាក់ថា៖ «ពេលនេះយើងអាចចោទជាសំណួរថា បើខ្ញុំមិនរឹងក្បាលស្វែងរកវ៉ាក់សាំងពីចិនដែលជាមិត្តដែកថែបរបស់កម្ពុជា និងប្រសិនគ្មានការជួយឧបត្ថម្ភពីមិត្តចិនលើការផ្គត់ផ្គត់វ៉ាក់សាំង តើយើងមានវ៉ាក់សាំងមកពីណាចាក់ជូនប្រជាជនយើង?»។
សម្ដេចតេជោ ហ៊ុន សែន សង្កត់ធ្ងន់ថា៖ «ខ្ញុំបាននិយាយមិនតិចជាង ៣ដងថា (សូមកុំបារម្ភថា វ៉ាក់សាំងមកពីប្រទេសណា តែត្រូវបារម្ភពីការអត់វ៉ាក់សាំងចាក់)។ ពាក្យនេះត្រឹមត្រូវណាស់សម្រាប់ប្រទេសជាច្រើននៅលើពិភពលោក»។
ជាងនេះទៅទៀត កម្ពុជាក៏ទទួលបានវ៉ាក់សាំង Covishield ចំនួន ៣២៤,០០០ដូសផងដែរ ដែលផលិតឡើងនៅក្នុងប្រទេសឥណ្ឌាក្រោមការអនុញ្ញាតរបស់ក្រុមហ៊ុនផលិតវ៉ាក់សាំងអង់គ្លេស AstraZeneca ហើយត្រូវបានផ្ដល់មកកម្ពុជាតាមរយៈយន្តការរបស់អង្គការសុខភាពពិភពលោក។
វ៉ាកសាំងស៊ីណូហ្វាមចំនួន ៦០ម៉ឺនដូស បានដឹកមកដល់កម្ពុជាលើកដំបូងកាលពីថ្ងៃទី០៧ ខែកុម្ភៈ ហើយ ៣ថ្ងៃក្រោយមក យុទ្ធនាការចាក់វ៉ាក់សាំងទូទាំងប្រទេសបានចាប់ផ្ដើម។
ដើម្បីជាគម្រូ និងបង្ហាញការជឿជាក់លើវ៉ាក់សាំងរបស់ចិន សម្ដេចតេជោ ហ៊ុន សែន បានណែនាំទៅកូនៗរបស់សម្ដេច និងថ្នាក់ដឹកនាំដទៃទៀតដែលមានអាយុក្រោម ៦០ឆ្នាំ ឱ្យចាក់វ៉ាក់សាំងចិនដំបូងគេ នៅថ្ងៃដំបូងនៃការចាប់ផ្ដើមចាក់វ៉ាក់សាំងទូទាំងប្រទេសជាមួយស៊ីណូហ្វាម៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
