ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបញ្ជាក់ថា នឹងបើករាជធានីភ្នំពេញនៅសប្ដាហ៍ក្រោយនេះ ដោយរក្សាទុកការបិទខ្ទប់នៅតំបន់មានហានិភ័យនៃការឆ្លងមេរោគកូវីដ-១៩ខ្ពស់តែប៉ុណ្ណោះ។
សម្ដេចតេជោ ហ៊ុន សែន បានមានប្រសាសន៍បែបនេះនៅក្នុងសារឆ្លើយតបទៅនឹងអ្នកប្រើហ្វេសប៊ុកម្នាក់ ដែលបានសាកសួរថា តើរាជរដ្ឋាភិបាលនឹងបន្តបិទខ្ទប់រាជធានីភ្នំពេញតទៅទៀត ឬយ៉ាងណា បន្ទាប់ពីរយៈពេលនៃការបិទខ្ទប់ត្រូវបញ្ចប់នៅត្រឹមថ្ងៃទី០៥ ខែឧសភាសប្ដាហ៍ក្រោយនេះ។
សម្ដេចតេជោ ហ៊ុន សែន ឆ្លើយតបនឹងសំណួរអ្នកប្រើហ្វេសប៊ុកថា៖ «ពុំមានហេតុផលបន្តបិទទេ។ យើងនឹងបើក តែខេត្ត ឬរាជធានីអាចបិទតំបន់តូចៗដែលនៅមានហានិភ័យលើការឆ្លងខ្ពស់»។
ការបិទខ្ទប់អស់រយៈពេលជាង ២សប្ដាហ៍មកនេះ ប្រមុខរាជរដ្ឋាភិបាលសម្ដេចតេជោ ហ៊ុន សែន បញ្ជាក់ថា «ជាការបង្ខំចិត្តដើម្បីកាត់បន្ថយការឆ្លង និងការស្លាប់របស់ប្រជាជនយើង។ សូមយោគយល់ដល់ការលំបាករួមរបស់ជាតិ»។
រាជធានីភ្នំពេញ និងក្រុងតាខ្មៅ ត្រូវបានបិទខ្ទប់អស់រយៈពេលជាង ២សប្ដាហ៍រួចមកហើយ ហើយបន្តបិទខ្ទប់រហូតដល់ថ្ងៃទី០៥ ខែឧសភាខាងមុខនេះ ដើម្បីទប់ស្កាត់ការឆ្លងរីករាលដាលនៃមេរោគកូវីដ-១៩៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
