ភ្នំពេញ ៖ ឯកឧត្ដម សុខ ដារ៉ា អគ្គលេខាធិការ នៃ​និយ័តករ​បរធនបាលកិច្ច កម្ពុជា បានឱ្យដឹងថា វិស័យបរធនបាលកិច្ច​កម្ពុជាមានកំណើនខ្ពស់រហូតដល់ ៩៤០ដុល្លារអាមេរិកក្នុងដើមឆ្នាំ ២០២៣នេះ ហើយរំពឹងថា នឹងកើនឡើងខ្ពស់ជាង ១ពាន់លានដុល្លារអាមេរិកនាចុងឆ្នាំ២០២៣នេះ។

ឯកឧត្ដម សុខ ដារ៉ា បានថ្លែងឱ្យដឹងបែបនេះ ក្នុងឱកាសចូលរួម ក្នុងសិក្ខាសាលាផ្សព្វផ្សាយស្តីពី «បរធនបាលកិច្ច៖ យន្តការប្រតិបត្តិការ និង​វាក្យសព្ទគន្លឹះ» ដើម្បី​​បញ្ជ្រាប​ការយល់ដឹង ជូនដល់សិស្ស និស្សិត និង អ្នកសារព័ត៌មាន នៅ​ទីស្តីការ​អាជ្ញាធរសេវាហិរញ្ញវត្ថុមិនមែនធនាគារ នាថ្ងៃទី៤ ខែមេសា ឆ្នាំ២០២៣នេះ។

ឯកឧត្ដមថ្លែងថាកត្តាដែលធ្វើឱ្យមានកំណើនខ្ពស់នៅក្នុងវិស័យបរធនបាលកិច្ចនៅកម្ពុជា រីកច្រើនបាន​ឆាប់រហ័ស​ក្នុង​រយៈ​ពេលខ្លីបែបនេះ គឺបណ្ដាលមកពីកត្តាស្ថានភាពនៃប្រទេសកម្ពុជាទាំងមូលដែលមាន សន្ដិភាព ស្ថេរភាព​នយោបាយ​ ស្ថេរភាពសេដ្ឋកិច្ច និងទទួលបាននូវទំនុកចិត្តពី​វិនិយោគិន​បរទេស។

គួរបញ្ជាក់ថា និយ័តករបរធនបាលកិច្ច មានចក្ខុវិស័យ គ្រប់គ្រង ត្រួតពិនិត្យ និងអភិវឌ្ឍវិស័យ​បរធនបាលកិច្ចក្នុង​ព្រះរាជាណាចក្រកម្ពុជា ក្នុងគោលបំណងចូលរួមចំណែក ដល់ការអភិវឌ្ឍសេដ្ឋកិច្ចជាតិ និងសង្គម តាមរយៈការ​បង្កើនការវិនិយោគក្នុងស្រុកដែលជាប្រភពនៃការបន្ថែមចំណូលពន្ធជាតិ, ជំរុញការធ្វើពិពិធកម្មហិរញ្ញវត្ថុ ដើម្បី​ជាប្រយោជន៍ដល់ប្រជាពលរដ្ឋកម្ពុជា និងផ្ដល់លទ្ធភាពដល់ការតាមដាន និងគ្រប់គ្រងនូវលំហូរទុនលើគ្រប់វិស័យ ដែលកំពុងធ្វើប្រតិបត្តិការក្នុងប្រទេសកម្ពុជា សំដៅទាក់ទាញទំនុកចិត្តបន្ថែមពីដៃតួអភិវឌ្ឍនានា និងឆ្លើយតបទៅ​នឹងតម្រូវការហិរញ្ញវត្ថុសម្រាប់ការវិនិយោគនៅកម្ពុជា៕ អត្ថបទ៖ វ៉ន ដារ៉ា