​បាល់ទាត់៖ ​ខ្សែការពារ​ក្រុម​បិសាច​ក្រហម Manchester United, Luke Shaw បាន​ចុះហត្ថលេខា​បន្ត​កិច្ចសន្យា​ថ្មី ៤ឆ្នាំ​បន្ថែមដែល​នឹង​រក្សា​រូបគេ​នៅ Old Trafford ដល់​ឆ្នាំ២០២៧​។ ឆ្លងតាម​កិច្ចសន្យា​នេះ​មានន័យថា ​កីឡាករ​វ័យ ២៧​ឆ្នាំ​រូប​នេះ​នឹង​រួម​រស់​ជាមួយ Manchester United ជាង​មួយ​ទសវត្សរ៍​តាំងពី​ផ្លាស់​ពី Southampton នៅ​ឆ្នាំ​២០១៤​។

​​Luke Shaw មាន​រដូវ​កាល​ដ៏​អស្ចារ្យ​របស់​ខ្លួន​ក្រោម​ការដឹកនាំ​របស់​អ្នកចាត់ការ Erik ten Hag ដោយ​បាន​បង្ហាញខ្លួន ៣៦​ប្រកួត​គ្រប់​ក្របខណ្ឌ រកបាន ១គ្រាប់ និង​បោះ​បញ្ជូន ៦លើក​។ ​​គិត​មក​ទល់​ពេល​នេះ Luke Shaw បង្ហាញខ្លួន​សរុប​ឱ្យ Manchester United បាន ២៤៩​ប្រកួត​ហើយ និង​ធ្លាប់​ឆ្លង​កាត់​ឧបសគ្គ​មួយ​ចំនួន​តាម​រយៈ​ការ​ផ្លាស់ប្តូរ​អ្នកចាត់ការ​កន្លងមក​។ ​Luke Shaw ធ្លាប់​ទទួលរង​ការរិះគន់​ពី​អតីត​អ្នកចាត់ការ Jose Mourinho ដែល​ទាមទារ​ឱ្យ​រូបគេ​អភិវឌ្ឍ​ខ្លួន និង​មិនសូវ​បាន​ចូល​លេង​ពេញលេញ​ឡើយ​ ក្រោម​ការដឹកនាំ​របស់​អ្នកចាត់ការ​សញ្ជាតិ​ព័រទុយហ្កាល់​រូប​នេះ​។

​​តែ​ក្រោយពី​ការ​មក​ដល់​របស់ Ole Gunnar Solskjaer និង​បន្ទាប់មក Erik ten Hag, Luke Shaw មាន​ឱកាស​ចូល​លេង​ទៀងទាត់​។ ​Luke Shaw ក៏​ធ្លាប់​បង្ហាញខ្លួន​ឱ្យ​ក្រុម​ជម្រើស​ជាតិ​អង់គ្លេស ២៩​លើក​ផង​ដែរ និង​ស៊ុត​បញ្ចូល​ទី ១​គ្រាប់​ក្នុង​វគ្គ​ផ្តាច់ព្រ័ត្រ Euro ដែល​អង់គ្លេស​ចាញ់​អ៊ីតាលី​ដោយ​បាល់ ១១ម៉ែត្រ​កាត់​សេចក្តី​៕

​អត្ថបទ​៖​នាង សុភា​វុ​ធ