ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈកម្ពុជា និងក្រសួងការងារ ជនពិការ និងសង្គមកិច្ចវៀតណាម បានឯកភាពចុះហត្ថលេខាលើផែនការសកម្មភាពរយៈពេល ៥ឆ្នាំ (ឆ្នាំ២០២៣-២០២៧) សម្រាប់អនុវត្តក្នុងកិច្ចសហប្រតិបត្តិការលើវិស័យការងាររវាងប្រទេសទាំងពីរ។
ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈកម្ពុជា នៅក្នុងបណ្តាញសង្គម (តេឡេក្រាម) បានឲ្យដឹងថា ក្នុងកិច្ចប្រជុំថ្នាក់រដ្ឋមន្ត្រីការងារកម្ពុជា-វៀតណាម និងកិច្ចប្រជុំពាក់ព័ន្ធ នៅហាណូយ ប្រទេសវៀតណាម រយៈពេល ២ថ្ងៃ នៅថ្ងៃទី៤-៥ ខែមេសា ឆ្នាំ២០២៣ ដែលភាគីកម្ពុជា ដឹកនាំដោយឯកឧត្តមផ្ទាល់ និងភាគីវៀតណាម ដឹកនាំដោយឯកឧត្តម DAO NGUC DUNG រដ្ឋមន្ត្រីក្រសួងការងារជនពិការ និងសង្គមកិច្ច ភាគីទាំងពីរបានឯកភាពគ្នា ក្នុងការចុះហត្ថលេខាលើផែនការសកម្មភាពរយៈពេល ៥ឆ្នាំខាងលើនេះ ដោយផ្តោតលើចំណុចសំខាន់ៗមួយចំនួន រួមមាន៖ ការផ្លាស់ប្ដូរប្រព័ន្ធកម្មវិធី ការសិក្សា ជំនាញឯកទេស ការស្រាវជ្រាវ ការសិក្សា និងព័ត៌មានពាក់ព័ន្ធវិស័យនានា រួមទាំងការសិក្សាប្រៀបធៀបលើវិស័យការងារមុខរបរ ការបណ្ដុះបណ្ដាលវិជ្ជាជីវៈ និងរដ្ឋបាលការងារ ដូចជាការចរចាជាសមូហភាព ការដាក់ឱ្យអនុវត្ត និងការអនុវត្តច្បាប់ ការដោះស្រាយវិវាទការងារ សន្ដិសុខសង្គម ការគាំពារពលកម្មសេរីភាពខាងសមាគម សុខភាព និងសុវត្ថិភាពការងារ ការគ្រប់គ្រងហត្ថពលកម្មបរទេស និងការផ្លាស់ប្ដូរព័ត៌មានទៅលើការពង្រឹងផលិតភាពការងារ, ការលើទឹកចិត្តការផ្លាស់ប្ដូរទស្សនៈកិច្ចរវាងមន្ត្រីទទួលបន្ទុក និងមន្ត្រីជំនាញ, ការគ្រប់គ្រងទេសន្តរប្រវរសន៍ការងាររវាងប្រទេសទាំងពីរ, ការផ្លាស់ប្តូរព័ត៌មាន ដើម្បីទប់ស្កាត់ការជ្រើសរើស និងប្រើប្រាស់ពលករខុសច្បាប់ក៏ដូចជាការទប់ស្កាត់ការកេងប្រវ័ញ្ចកម្លាំងពលកម្ម និងការជួញដូរមនុស្ស និងផ្នែកផ្សេងទៀត នៃកិច្ចសហប្រតិបត្តិការដែលភាគីទាំងពីរបានព្រមព្រៀងគ្នាលើវិស័យការងារ។
ឯកឧត្តមរដ្ឋមន្ត្រី បានបញ្ជាក់ទៀតថា ភាគីទាំងពីរបានចុះហត្ថលេខាលើសេចក្តីថ្លែងការណ៍រួមគ្នា ដោយផ្តោតលើចំណុចសំខាន់ៗមួយចំនួនរួមមាន៖១)លើកម្ពស់កិច្ចសហប្រតិបត្តិការ រវាងប្រទេសទាំងពីរលើវិស័យការងារ និងបណ្តុះបណ្តាលវិជ្ជាជីវៈ,
២)ប្តេជ្ញាអនុវត្តឱ្យទទួលបានលទ្ធផលខ្ពស់លើការអនុវត្តអនុស្សរណៈនៃការយោគយល់គ្នារវាងក្រសួងទាំងពីរដែលបានចុះហត្ថលេខាជាមួយគ្នានៅកម្ពុជាកាលពីថ្ងៃទី៨ ខែវិច្ឆិកា ឆ្នាំ២០២២កន្លងមក, ៣)ឯកភាពលើកិច្ចសហប្រតិបត្តិការទៅវិញទៅមកដើម្បីដោះស្រាយនិន្នាការ និងបញ្ហាប្រឈមដែលកំពុងកើតមាននាពេលបច្ចុប្បន្ន ដូចជាបដិវត្តឧស្សាហកម្ម ៤.០ និងការផ្លាស់ប្តូររចនាសម្ព័ន្ធទីផ្សារការងារជាដើម, ៤)ផ្លាស់ប្តូរទស្សនៈនៃការគ្រប់គ្រងវិស័យការងារ និងមុខរបរ ការអភិវឌ្ឍទីផ្សារការងារ និងវិស័យអប់រំបណ្តុះបណ្តាលបចេ្ចកទេស និងវិជ្ជាជីវៈ (TVET) នៃប្រទេសទាំងពីរ ដោយភាគីទាំងពីរបានឯកភាពដាក់ចេញផែនការសកម្មភាពរយៈពេល ៥ឆ្នាំ (ឆ្នាំ២០២៣-២០២៧) សម្រាប់ការអនុវត្ត MoU ខាងលើ ដើម្បីផ្លាស់ប្តូរបន្ថែមទៀតនូវព័ត៌មានថ្មីៗ ទិន្នន័យ ការស្រាវជ្រាវ ជំនាញ និងដំណើរទស្សនកិច្ចការងារ របបសន្តិសុខសង្គម និងបណ្តុះបណ្តាលវិជ្ជាជីវៈ។ ការពង្រឹងការគ្រប់គ្រងទេសន្តរប្រវេសន៍នៃប្រទេសទាំងពីរ ក្នុងការសម្របសម្រួលឯកសារដែលតម្រូវដោយច្បាប់ និងបទប្បញ្ញត្តិ និងទប់ស្កាត់ការជ្រើសរើស និងការប្រើប្រាស់ពលករដោយខុសច្បាប់ ក៏ដូចជាការកេងប្រវ័ញ្ចកម្លាំងពលកម្ម និងការជួញដូរមនុស្ស៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
