ភ្នំពេញ ៖ ឯកឧត្តម ហ៊ុន ម៉ាណែត បេក្ខជននាយករដ្ឋមន្រ្តីនៃកម្ពុជានាពេលអនាគត បានលើក​ឡើងថា វត្តមានរបស់ ក្រុមហ៊ុនជប៉ុន ដែលបានកើតឡើងជាបន្តបន្ទាប់លើទឹកដីកម្ពុជានោះ គឺបានឆ្លុះបញ្ចាំង និងបង្ហាញថា បាន​ចូលរួម​សុខរួមទុក្ខជាមួយប្រជាជនកម្ពុជា ពិសេសទៅ​ទៀតនោះគឺបានចូលរួមអភិវឌ្ឍសេដ្ឋកិច្ចនៅកម្ពុ ជាឲ្យកាន់តែរីក​ចំរើន​បន្ថែមទៀត។

ថ្លែងក្នុងពិធីសម្ពោធបើកដំណើរការជាផ្លូវការរបស់ផ្សារទំនើប Aeon Mall Mean Chey ថ្ងៃទី៧ ខែមេសា ឆ្នាំ២០២៣​នេះ​ ឯកឧត្តម ហ៊ុន ម៉ាណែត បានលើកឡើងថា «សូមអបអរសាទរចំពោះ​សមិទ្ធផលផ្សារទំនើប Aeon Mall Mean Chey ដែលជាផ្សារទំនើបទី៣ របស់ក្រុមហ៊ុន AEON Mall (Cambodia) Co., LTD នៅក្នុងប្រទេសកម្ពុជា ដែលពិតជា​បានឆ្លុះបញ្ចាំងអំពីទំនុកចិត្ត ស្មារតីសុទិដ្ឋិនិយម និងឆន្ទៈដ៏មុតមាំ​របស់ក្រុមហ៊ុនក្នុង​ការរួមសុខរួមទុក្ខជាមួយប្រជាជន​កម្ពុជា ជាពិសេសការចូលរួមអភិវឌ្ឍសង្គម-សេដ្ឋកិច្ចកម្ពុជា ឱ្យកាន់តែមានភាពធន់ និងរីកចម្រើនរឹងមាំ»។

ឯកឧត្តមបានបន្តថា «សំណង់ និងការរៀបចំផ្សារដ៏ទំនើបមួយនេះ ក៏បានបង្ហាញថា ក្រុមហ៊ុនមិន​បាន​ផ្តោតតែទៅ​លើការទាញយកផលចំណេញប៉ុណ្ណោះទេ ប៉ុន្តែក្រុមហ៊ុនក៏បាន​គិតគូរផងដែរ​អំពីការ​ចូលរួមក្នុងកិច្ចការសង្គម តាមរយៈសកម្មភាពមួយចំនួន ដូចជាការបន្តគាំទ្រ​ដល់ផលិត​ផលក្នុងស្រុក, ការរៀបចំកម្មវិធីវប្បធម៌ជា​ប្រចាំជាមួយ​នឹងសាកលវិទ្យាល័យ​ភូមិន្ទវិចិត្រសិល្បៈ ដើម្បីចូលរួមលើកកម្ពស់វប្បធម៌ខ្មែរ និងការចូលរួមក្នុងគោលដៅអភិវឌ្ឍន៍​ប្រកបដោយចីរភាព ជាដើមនោះ»។ ឯកឧត្តមបន្តថា សមិទ្ធផលទាំងនេះ ក៏បានរួមចំណែកក្នុងការអភិវឌ្ឍរបស់​រាជធានីភ្នំពេញ និងប្រទេសកម្ពុជាទាំងមូលផងដែរ តាមរយៈការផ្តល់ឱកាសការងារ​ជូនដល់ប្រជាជនកម្ពុជា​ ជាច្រើន​ពាន់នាក់ ព្រមទាំងឱកាសវិនិយោគ និងអាជីវកម្មថ្មីៗសម្រាប់វិនិយោគិន និងអាជីវករទាំងក្នុង និងក្រៅស្រុក។

ឯកឧត្តមក៏បានលើកឡើងផងដែរថា ជាមួយនឹងវត្តមានរបស់ ឯកឧត្តម ឯកអគ្គរាជទូតជប៉ុនប្រចាំកម្ពុជា និង​តំណាង​វិនិយោគិន ធុរជន និងដៃគូអភិវឌ្ឍន៍ មកពីប្រទេសជប៉ុននាឱកាសនេះ, សូមយកឱកាសនេះ សម្តែងនូវ​ការ​អបអរសាទរ​​ចំពោះការប្រារព្ធខួបលើកទី៧០ នៃការបង្កើតចំណងការទូតផ្លូវការកម្ពុជា-ជប៉ុន ជាពិសេសការលើក​កម្ពស់កម្រិតនៃទំនាក់ទំនងរវាងកម្ពុជា-ជប៉ុន ទៅជា “ភាពជាដៃគូយុទ្ធសាស្ត្រគ្រប់ជ្រុងជ្រោយ” ចាប់ពីឆ្នាំ២០២៣ នេះ។ ភាពជាដៃគូកម្ពុជា-ជប៉ុន ទាំងក្នុងក្របខ័ណ្ឌទ្វេភាគី និងពហុភាគី ក្នុងផ្នែកពាណិជ្ជកម្ម, ការអភិវឌ្ឍ, មនុស្សធម៌ និងទំនាក់ទំនងរវាងប្រជាជន និងប្រជាជន បានក្លាយជាកម្លាំងចលករដ៏សំខាន់ ដែលបានចូលរួមដល់​ការពន្លឿនការ​អភិវឌ្ឍសង្គម-សេដ្ឋកិច្ចរបស់កម្ពុជាលើគ្រប់វិស័យ។

ជាមួយគ្នានោះដែរ ឯកឧត្តម ហ៊ុន ម៉ាណែត ក៏បានលើកឡើងផងដែរថា រាជរដ្ឋាភិបាលកម្ពុជា ក្រោមការដឹកនាំរបស់ សម្តេចតេជោ ហ៊ុន សែន តែងបានចាត់ទុកការរក្សាសុខសន្តិភាព ជាអាទិភាពធំចម្បងបំផុត សម្រាប់ជាបុរេលក្ខខណ្ឌ​ក្នុង​ការអភិវឌ្ឍផ្នែកសង្គម និងសេដ្ឋកិច្ច។ ជាមួយនឹងសុខសន្តិភាព ដែលសម្រេចបានដោយលំបាក, រាជរដ្ឋាភិបាល បានខិតខំប្រឹងប្រែងកសាងប្រទេសជាតិឡើងវិញពីផេះផង់នៃសង្គ្រាម រហូតបានក្លាយជាសេដ្ឋកិច្ចមួយ​ប្រកបដោយ​ថាមវន្ត និងមានភាពរស់រវើក តាមរយៈការដាក់ចេញ និងការអនុវត្តគោលនយោបាយ, យុទ្ធសាស្ត្រ និងវិធានការ​អភិវឌ្ឍន៍​ជាបន្តបន្ទាប់ ប្រកបដោយភាពប្រាកដនិយម និងដោយផ្តោតលើតម្រូវការជាក់ស្តែង, ជីវភាព និងសុខទុក្ខ​របស់ប្រជាជនជាធំ៕ អត្ថបទ ៖ បាន ចក់​