បាត់ដំបង ៖ ឯកឧត្តម ថុល ភារៈ អនុប្រធានក្រុមការងារគណបក្សចុះមូលដ្ឋានឃុំព្រះផុស ស្រុកគាស់ក្រឡ ខេត្តបាត់ដំបង តំណាងឯកឧត្តមបណ្ឌិត ស្រេង វង្សហៀង ប្រធានក្រុមការងារ បានបន្តចុះសួរសុខទុក្ខ​ប្រជាពលរដ្ឋក្នុងភូមិចំនួន៣ និងបានផ្សព្វផ្សាយពីខ្លឹមសារគោលនយោបាយរបស់គណបក្សប្រជាជនកម្ពុជា ។

ការចុះសួរសុខទុក្ខនេះ ធ្វើឡើងនៅថ្ងៃទី៩ ខែមេសា ឆ្នាំ២០២៣ ដោយមានការចូលរួមពីសំណាក់​ក្រុមការងារ​គណបក្សនៅឃុំព្រះផុស សមាជិក សមាជិកាគណបក្ស រួមទាំងក្រុម​យុវជនជាច្រើននាក់ទៀត ។

ឯកឧត្តម ថុល ភារៈ បានរំលឹកប្រជាពលរដ្ឋ ដែលមានឈ្មោះក្នុងបញ្ជីឈ្មោះបោះឆ្នោត ត្រូវត្រៀមនូវឯកសារ​បោះឆ្នោត​ឲ្យ​បានរួចរាល់ និងត្រឹមត្រូវតាមការកំណត់របស់គណៈកម្មាធិការជាតិរៀបចំការបោះឆ្នោត (គ.ជ.ប) មានអត្តសញ្ញាបណ្ណជាដើម។

ឯកឧត្តម បានបន្តថា ការងារបោះឆ្នោតជ្រើសរើសតំណាងរាស្រ្តអាណត្តិទី៧ ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ខាងមុខនេះ សូមឱ្យសមាជិក សមាជិកាគណបក្សទាំងអស់ ត្រូវបន្តខិតខំបំពេញការងារឱ្យកាន់តែសកម្មឡើង ដើម្បីទទួលបានការគាំទ្រ និងយកជ័យជម្នះជូនគណបក្សប្រជាជនឱ្យកាន់តែច្រើន ។

ឯកឧត្តមអនុប្រធាន ក៏បានអំពាវនាវដល់ប្រជាពលរដ្ឋ សូមបន្តបោះឆ្នោតជូនគណបក្សប្រជាជនកម្ពុជា ដើម្បីឲ្យសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានបន្តធ្វើជានាយករដ្ឋមន្ត្រី ដើម្បីដឹកនាំ និងអភិវឌ្ឍន៍ប្រទេសជាតិ ឲ្យកាន់តែមានភាពរីកចម្រើន និងគាំទ្របេក្ខភាពឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្ត្រីនាពេលអនាគត ។

ទន្ទឹមនេះ តំណាងឯកឧត្តមបណ្ឌិត ស្រេង វង្សហៀង រូបនេះ បានជំរុញបន្ថែមដល់អាជ្ញាធរមូលដ្ឋាន ខិតខំដោះស្រាយសំណូមពររបស់ប្រជាពលរដ្ឋ អនុវត្តគោលនយោបាយភូមិ-ឃុំមានសុវត្ថិភាព ឲ្យបានល្អប្រសើរ ដើម្បីឲ្យប្រជាពលរដ្ឋមានភាពកក់ក្ដៅ និងរស់នៅដោយភាពសុខសាន ៕ អត្ថបទ​ ៖ បាន សុខរិទ្ធិ