​បាល់ទាត់៖ ​ក្របខណ្ឌ​លី​គ​កំពូល​អេ​ស្ប៉ា​ញ La Liga​ បាន​ឈាន​ដល់​សប្តាហ៍​ទី​៣៤ ហើយ​ចុង​សប្តាហ៍​កន្លងទៅ​ ខណៈ​ស្ថានភាព​ប្រជែង​ជើងឯក​នៅតែ​បន្ត​តានតឹង ​ក្រោយ​ក្រុម​យក្ស​ទាំងបី​សុទ្ធតែ​ឈ្នះ​ដូចគ្នា​។ ​Barcelona ប្រកួត​ចុងក្រោយ​គេ​យប់មិញ​ បាន​យកឈ្នះ​នៅ​ទឹកដី Valencia ៣-២​។

​​ក្រុម​ម្ចាស់ផ្ទះ Valencia នាំមុខ​មុន​អោយ Gabriel នាទី​ទី៥០ មុនពេល​ដែល Messi តាម​ស្មើ​វិញ​នាទី​ទី៥៧​។ ក្រោយមក Antoine Griezmann​ ស៊ុត​នាំមុខ​លើកដំបូង​អោយ Barcelona នាទី​ទី៦៣ មុន​ពេល​ដែល Messi បន្ថែម​គ្រាប់​ទី២ របស់ខ្លួន​នៅ​នាទី​ទី៦៩​។ ​មុន​ចប់ Valencia ក៏​តប​បាន​មួយ​គ្រាប់​ចុង​ក្រោយ​ដោយ Carlos Soler​ នាទី​ទី៨៣​។ ​ជ័យជំនះ​នេះ​ធ្វើអោយ Barcelona បន្ត​ឈរ​លេខ៣ មាន ៧៤ពិន្ទុ​ស្មើ​ជាមួយ​ក្រុម​លេខ២ Real Madrid​។

​​ក្រុម​របស់លោក Zinedine Zidane បាន​យកឈ្នះ Osasuna ២-០ កាលពី​ថ្ងៃ​សៅរ៍​ដោយ​គ្រាប់​បាល់​របស់ Eder Militao ​និង Casemiro​។ ​ចំណែក​ក្រុម​កំពូល​តារាង​នៅតែ​ជា Atletico Madrid ដដែល​មាន ៧៦ពិន្ទុ​ពីលើ Real Madrid និង Barcelona ២ពិន្ទុ​។ ​ក្រុម​របស់លោក Diego Simeone ​បាន​យកឈ្នះ​នៅ​ទឹកដី Elche កាលពី​ថ្ងៃ​សៅរ៍ ១-០ ដោយ​គ្រាប់​បាល់​ជ័យជំនះ​របស់ Marcos Llorente៕

​អត្ថបទ​៖​នាង សុភា​វុ​ធ