កូរ៉េខាងជើង៖ កូរ៉េខាងជើងបាននិយាយថា ប្រធានាធិបតីសហរដ្ឋអាមេរិក លោក ចូ បៃដិន បានបង្កើតកំហុសដ៏ធំមួយ ដោយចាត់ទុកកម្មវិធីនុយក្លេអ៊ែរទីក្រុងព្យុងយ៉ាងថា ជាការគំរាមកំហែងដល់ពលរដ្ឋអាមេរិក និងសន្តិសុខសកល។
លោក ក្វុន ជុងហ្គាន់ ប្រធាននាយកដ្ឋានទទួលបន្ទុកកិច្ចសហរដ្ឋអាមេរិក នៅក្រសួងការបរទេសកូរ៉េខាងជើងបានផ្តល់អនុសាសន៍បែបនេះ នៅក្នុងសេចក្ដីថ្លែងការណ៍មួយចុះផ្សាយដោយ ទីភ្នាក់ងារព័ត៌មានកណ្ដាលកូរ៉េខាងជើង KCNA កាលពីថ្ងៃអាទិត្យ។ ការឆ្លើយតបបែបនេះបានធ្វើឡើងក្រោយពេលលោក បៃដិន បង្ហាញគោលនយោបាបរទេសរបស់លោក ចំពោះកូរ៉េខាងជើងនៅក្នុងសុន្ទរកថាមកកាន់សភារបស់លោក កាលពីសប្ដាហ៍មុន។ សេចក្ដីថ្លែងការណ៍នោះបាននិយាយថា សហរដ្ឋអាមេរិកដើរតួជាការគំរាមកំហែងនុយក្លេអ៊ែរ ចំពោះកូរ៉េខាងជើង។ សហរដ្ឋអាមេរិកចាត់ទុកការបង្អាក់សម្រាប់ស្វ័យការពារ របស់កូរ៉េខាងជើងគឺជាការគំរាមកំហែងនោះ វាគឺជាឈ្លានពានមួយមកលើសិទ្ធិស្វ័យការពាររបស់ពួកគេ។
មន្ត្រីរូបនោះបាននិយាយថា ឥឡូវចំណុចសំខាន់នៃគោលនយោបាយអាមេរិក មកលើកូរ៉េខាងជើងបានលាតត្រដាងយ៉ាងច្បាស់ ប្រទេសរបស់លោកនឹងបង្ខំចិត្តចាត់វិធានការឆ្លើយតប។ លោកបានធ្វើការព្រមានផងដែរថា សហរដ្ឋអាមេរិកត្រូវតែស្វែងយល់ដោយខ្លួន នៅក្នុងស្ថានភាពដ៏គ្រោះថ្នាក់នេះ។ កូរ៉េខាងជើងបានប្រតិកម្មផងដែរ ចំពោះការចោទប្រកាន់របស់អ្នកនាំពាក្យក្រសួងការបរទេសសហរដ្ឋអាមេរិក លោក ណេដ ប្រាយ ថា ទីក្រុងព្យុងយ៉ាងបានចាត់វិធានការតឹងរឹងកាន់តែខ្លាំងឡើង ដើម្បីពង្រឹងការគ្រប់គ្រងប្រជាពលរដ្ឋរបស់ខ្លួន ក្រោមលេសប្រយុទ្ធប្រឆាំងនឹងជំងឺ COVID-19 ដែលរួមទាំងបទបញ្ជាបាញ់សម្លាប់នៅតាមព្រំដែនជាមួយចិន៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
