ភ្នំពេញ ៖ ថ្នាក់ដឹកនាំ មន្ត្រីរាជការ វេជ្ជបណ្ឌិត សាស្ត្រាចារ្យ បុគ្គលិក និងអ្នកផ្តល់សេវាកម្មផ្សេងៗ នៃ​មន្ទីរពេទ្យកាល់ម៉ែត ព្រឹកថ្ងៃទី១០ ខែមេសា ឆ្នាំ២០២៣នេះ បានប្រារព្ធពិធីសូត្រមន្តបង្សុកូលឧទ្ទិសកុសល ក្នុង​ឱកាសបុណ្យ​ចូលឆ្នាំប្រពៃណីជាតិខ្មែរ ឆ្នាំថោះ បញ្ចស័ក ព.ស២៥៦៧ គ.ស២០២៣។

​ពិធីសូត្រមន្តបង្សុកូលនាព្រឹកនេះ ត្រូវបានប្រព្រឹត្តទៅក្រោមការនិមន្ត សម្តេចព្រះឧត្តមវង្សាគតិបណ្ឌិត មួង រ៉ា សម្តេចព្រះសង្ឃនាយករងទី៣ ព្រះអនុប្រធាន និងជាអគ្គលេខាធិការដ្ឋានថេរសភា នៃព្រះពុទ្ធសាសនា នៃ​ព្រះរាជាណាចក្រកម្ពុជា និងឯកឧត្តមសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត។

ឯកឧត្តម សាស្រ្តាចារ្យ ឈាង រ៉ា បានថ្លែងថា ជាប្រពៃណីរបស់ជាតិខ្មែរយើង កាលណានៅពេលបុណ្យចូលឆ្នាំ យើងតែងតែប្រារព្ធពិធីសូត្រមន្តបង្សុកូល រាប់បាត្រ ដើម្បីឧទិ្ទសដល់វិញ្ញាក្ខន្ធបុព្វការីជនដែលបានចែកឋានទៅ ជាពិសេសនៅក្នុងមនី្ទរពេទ្យកាល់ម៉ែត យើងតែងតែមានអ្នកជំងឺ ដែលពេលខ្លះក្រុមការងារ​គ្រូពេទ្យជួយសង្រ្គោះ​បានទាន់​ពេលវេលា និងពេលខ្លះអ្នកជំងឺក៏ដល់ពេលវេលា ក៏លាចាកទៅកាន់លោកខាងមុខ។ ដូច្នេះហើយបានជាមនី្ទរពេទ្យកាល់ម៉ែត បានរៀបចំកម្មវិធីនេះឡើងជារៀងរាល់ឆ្នាំ សំដៅមិនត្រឹមតែក្រុមញាតិ​របស់មន្រី្តរាជការ បុគ្គលិក និងអ្នកផ្តល់សេវាកម្មផ្សេងៗនោះទេ គឺព្រមទាំងសំដៅទៅកាន់បងប្អូនប្រជាពលរដ្ឋ ដែលលាចាកនោះផងដែរ និងដើម្បីជួបជុំមន្រី្តរាជការ បុគ្គលិកទាំងអស់ ដែលមានសទ្ធា ក្នុងការចូលរួម​ធ្វើ​បុណ្យតាមប្រពៃណីរៀងរាល់ឆ្នាំ ដើម្បីភាពរីករាយ សាមគ្គីភាព និងការឯកភាពគ្នា ក្នុងពេលបំពេញភារកិច្ច ធ្វើយ៉ាងណាបំរើសេវាថែទាំសុខភាព ជូនបងប្អូនប្រជាពលរដ្ឋ ឲ្យបានជាសះស្បើយ ឲ្យអស់លទ្ធភាព​ដែលអាច​ធ្វើទៅបាន។ មួយវិញទៀត ក៏ដើម្បីលើកទឹកចិត្តឲ្យបងប្អូនខិតខំបំពេញភារកិច្ចបន្ថែមសម្រាប់ឆ្នាំថ្មី និងទទួលបានជោគជ័យក្នុងភារកិច្ចគ្រប់ៗគ្នា។

​នៅក្នុងឱកាសនៃពិធីសូត្រមន្តបង្សុកូល សុំសិរីសួស្តីនាពេលនេះ ថ្នាក់ដឹកនាំមន្ទីរពេទ្យ ក៏បានចូលរួមទស្សនា ការ​សម្តែងរបាំត្រុដិ ដែលត្រូវបានប្រជាពលរដ្ឋខែ្មរជឿជាក់ថា ជារបាំប្រពៃណីបុរាណមួយ ដែលអាចបណ្តេញ ឧបទ្រពចង្រៃ ក៏ត្រូវបានសម្តែងនៅក្នុងមន្ទីរពេទ្យកាល់ម៉ែតផងដែរ ដើម្បីជាកិច្ចបណ្តេញនូវឧបទ្រពចង្រៃ ក្នុងឆ្នាំចាស់ និងទទួលយកសិរីសួស្តីបវរមហាប្រសើរ ក្នុងឆ្នាំថ្មី ជូនដល់ថ្នាក់ដឹកនាំ និងមន្រ្តីរាជការទាំងអស់ ទទួលបាន​ជោគជ័យ​ថ្មីៗថែមទៀតផងដែរ៕ អត្ថបទ៖ រដ្ឋា