ភ្នំពេញ៖ សមាជិកសមាជិការដ្ឋសភា ជាមួយថ្នាក់ដឹកនាំអគ្គលេខាធិការដ្ឋានរដ្ឋសភា រួមទាំងមន្ត្រីរាជការនៃ​អគ្គលេខាធិការដ្ឋានរដ្ឋសភា បានរៀបចំពិធីសូត្រមន្តបង្សុកូល រាប់បាត្រព្រះសង្ឃ ៩អង្គ ដើម្បីអបអរសាទរ​បុណ្យចូលឆ្នាំថ្មី ប្រពៃណីជាតិខ្មែរ នៅថ្ងៃទី១០ ខែមេសា ឆ្នាំ២០២៣ ក្រោមអធិបតីភាព ឯកឧត្តម ឡេង ប៉េងឡុង អគ្គលេខាធិការរដ្ឋសភា ដើម្បីសុំសេចក្តីសុខ និងសិរីសួស្តីជ័យមង្គលវិបុលសុខគ្រប់ប្រការជូនចំពោះថ្នាក់ដឹកនាំ សមាជិក សមាជិកា រដ្ឋសភា និងអគ្គលេខាធិការដ្ឋានរដ្ឋសភា មន្រ្តីរាជការ និងប្រជាពលរដ្ឋទំាងអស់ នៅក្នុង​ឱកាសបុណ្យចូលឆ្នាំថ្មីប្រពៃណីជាតិ ដែលនិងមកដល់ក្នុងពេលឆាប់ៗនេះ។

សមាជិក សមាជិការដ្ឋសភា និងថ្នាក់ដឹកនាំ រួមជាមួយមន្រ្តីអគ្គលេខាធិការដ្ឋានរដ្ឋសភា បានឧទ្ទិសកុសល​ផលបុណ្យ​ជូន​បុព្វការីជន វីវជន យុទ្ធជន ស្នេហាជាតិ ដែលបានចែកឋានទៅកាន់លោកខាងមុខ សូមឱ្យដួងវិញ្ញាណក្ខន្ធលោក​អ្នកទាំងអស់ ឱ្យបានទៅកាន់សុគតិភព កុំបីឃ្លៀងឃ្លាតឡើយ និងបានបួងសួងដល់គុណបុណ្យព្រះរតនត្រ័យកែវទាំងបី វត្ថុសក្តិសិទ្ធទាំងឡាយក្នុងលោក ទេវតាឆ្នាំថោះ ព្រះនាម កិមិរាទេវី សូមប្រោសប្រទានសព្ទសាធុការពរជ័យ បវរសួស្ដី សិរីវឌ្ឍនា វិបុលសុខ មហាប្រសើរជូនចំពោះប្រជាពលរដ្ឋទាំងក្នុង និងក្រៅប្រទេស សូមបានប្រកបដោយ​ពុទ្ធពរទាំង​បួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

នៅឱកាសនោះ ក៏មានរៀបចំ ពិធីសម្តែងរបាំត្រុដិ ដើម្បីបណ្ដេញឧបទ្រពចង្រៃនៅក្នុងឆ្នាំចាស់ និងនាំមកនូវការ​រីកចម្រើន សុភមង្គល ព្រមទាំងទទួលបាននូវភាពជោគជ័យក្នុងការងារសម្រាប់ឆ្នាំថ្មីផងដែរ៕ ដោយ ៖ ឧត្ដម