អ៊ីស្រាអែល៖ ឪពុករបស់កូនស្រីជនជាតិអង់គ្លេសមានសញ្ជាតិអ៊ីស្រាអែល ២នាក់ដែលបានស្លាប់ក្នុងការបាញ់ប្រហារមួយនៅក្នុងតំបន់ West Bank គ្រប់គ្រងដោយអ៊ីស្រាអែលបានយំឱបសាកសពកូនទាំង២ ខណៈអ្នកកាន់មរណទុក្ខបានច្រៀងចម្រៀងកាន់ទុក្ខនៅពិធីបុណ្យសពរបស់ពួកគេកាលពីថ្ងៃអាទិត្យ។
នាង Maia និង Rina Dee វ័យ ២០ឆ្នាំ និង ១៥ឆ្នាំបានស្លាប់កាលពីថ្ងៃសុក្រ នៅពេលក្រុមជនសង្ស័យជាក្មាន់កាំភ្លើងប៉ាឡេស្ទីនបានបើកការបាញ់ប្រហារលើពួកគេ នៅក្នុងរថយន្តរបស់ខ្លួនក្នុងតំបន់ជ្រលងភ្នំហ្ស៊កដានី។ ម្ដាយរបស់ពួកគេគឺអ្នកស្រី Leah កំពុងស្ថិតក្នុងស្ថានភាពធ្ងន់ធ្ងរក្រោយការវះកាត់។ ការវាយប្រហារនេះបានកើតឡើង ស្របពេលភាពតានតឹង និងអំពើហិង្សាកើនឡើងខ្លាំងរវាងអ៊ីស្រាអែល និងប៉ាឡេស្ទីន។ ភាគច្រើននៃអ្នកចូលរួមក្នុងពិធីបុណ្យសពគឺជាយុវជន ខ្លះមកពីសាលារៀនដែលនាង Rina បានសិក្សា។
នៅខាងមុខក្បែរវេទិកាទាបមួយ ក្រុមគ្រួសារបានជួបជុំគ្នាដោយនិយាយទាំងទឹកភ្នែក និងឱបគ្នាសម្រាប់ពេលវេលាកាន់មរណទុក្ខដ៏ស្ងៀមស្ងាត់។ សាកសពទាំង២ ត្រូវបានយំឱបដោយឪពុករបស់ពួកគេគឺលោក Rabbi Leo Dee ដែលមានដើមកំណើតមកពីភូមិ Radlett ក្នុងចក្រភពអង់គ្លេស។ បន្ទាប់មកបានអង្គុយនៅខាងក្រោយ ផ្ទៃមុខរបស់លោកពោរពេញដោយទុក្ខព្រួយ ដៃរបស់លោកក្រសោបឱបកូនទាំង ៣នាក់របស់លោកដែលនៅរស់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
