អ៊ុយក្រែន៖ កងកម្លាំងរុស្ស៊ីបានបង្កើនការវាយប្រហារកាន់តែខ្លាំង នៅតាមទីក្រុងសមរភូមិមុខនានានៅក្នុងប្រទេសអ៊ុយក្រែនភាគខាងកើតកាលពីថ្ងៃចន្ទ ខណៈដែលក្រុមមន្ត្រីអ៊ុយក្រែនបាននិយាយសម្រាលស្ថានភាពលើរបាយការណ៍មួយដែលថា ទីក្រុង Kyiv កំពុងកែសម្រួលផែនការមួយចំនួនសម្រាប់ការវាយបក ដោយសារតែការលេចធ្លាយព័ត៌មានសម្ងាត់បំផុតផ្នែកចារកម្មរបស់សហរដ្ឋអាមេរិក។
ទីក្រុង Kyiv និយាយថា កងកម្លាំងរុស្ស៊ីកំពុងវាយសម្រុកលើមូលដ្ឋានជាច្រើនរបស់អ៊ុយក្រែន ជុំវិញទីក្រុងរងការឡោមព័ទ្ធ Bakhmut នៅក្នុងតំបន់ Donetsk ភាគខាងកើត និងទីក្រុង និងទីប្រជុំជនផ្សេងទៀតដោយការវាយប្រហារតាមអាកាស និងកាំភ្លើងធំ។ លោកឧត្ដមសេនីយ៍ឯក Oleksandr Syrskyi មេបញ្ជាការកងកម្លាំងថ្មើរជើងរបស់អ៊ុយក្រែនឈរជើងនៅទីក្រុង Bakhmut បាននិយាយថា សត្រូវបានផ្លាស់ប្ដូរនូវអ្វីដែលហៅថា យុទ្ធវិធីវាយកម្ទេចអ្វីគ្រប់យ៉ាងឲ្យក្លាយជាផេះផង់តាមរបៀបប្រើប្រាស់នៅប្រទេសស៊ីរី។ យុទ្ធវិធីនេះកំពុងបំផ្លិចបំផ្លាញអគារ និងមូលដ្ឋានជាច្រើនតាមរយៈការវាយប្រហារតាមអាកាស និងកាំភ្លើងធំ។
ប្រធានគ្រប់គ្រងតំបន់ Donetsk ដែលត្រូវបានលើកបន្តុបដោយទីក្រុង Moscow លោក Denis Pushilin បាននិយាយថា ពេលនេះកងកម្លាំងរុស្ស៊ីបានគ្រប់គ្រងទីក្រុងនេះប្រមាណ ៧៥%។ ខណៈការវាយប្រយុទ្ធគ្នាកាន់តែខ្លាំងក្លា សារព័ត៌មាន CNN របស់សហរដ្ឋអាមេរិកបានរាយការណ៍ថា អ៊ុយក្រែនត្រូវបានបង្ខំឲ្យកែប្រែផែនការយោធាមួយចំនួនមុនវាយបករយៈពេលយូរ ដោយសារតែការលេចធ្លាយព័ត៌មានចារកម្មរបស់សហរដ្ឋអាមេរិក ទាក់ទងនឹងសង្គ្រាមនៅអ៊ុយក្រែន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
