ភ្នំពេញ៖ ក្រសួងទេសចរណ៍ បញ្ជាក់ថា បន្ទប់ស្នាក់នៅតាមបណ្តាសណ្ឋាគារនៅតាមខេត្តរាជធានី គោលដៅទេសចរណ៍សំខាន់ ប្រមាណ៨០%ទៅ៩០% ត្រូវបានភ្ញៀវកក់ទុក​ដើម្បីស្នាក់​នៅដើរកម្សាន្ត​នៅថ្ងៃបុណ្យចូលឆ្នាំថ្មីប្រពៃណីខ្មែរ ​គិតត្រឹមថ្ងៃទី១១ ខែមេសា ។

លោក គីម សេរីរ័ត្ន ប្រធាននាយកដ្ឋានសណ្ឋាគារ ​និងម្ហូបអាហារនៃក្រសួងទេសចរណ៍​បានឲ្យ​ដឹង​ថា មកដល់ពេលនេះ បណ្តាបន្ទប់ស្នាក់នៅតាមផ្ទះសំណាក់ សណ្ឋាគារ និងផ្ទះបឹងកាឡូនៅតាម​ខេត្តសៀមរាប កំពត កែប និងខេត្តព្រះសីហនុជាដើម ប្រមាណ៩០% ត្រូវបានភ្ញៀវកក់ទុករួចរាល់ អំឡុងថ្ងៃបុណ្យចូលឆ្នាំថ្មី។

ដោយឡែកសម្រាប់នៅរាជធានី​ភ្នំពេញវិញ គឺមានភ្ញៀវកក់អស់ប្រមាណជាង ៧០% ​មានការកើន​ឡើង​ជាង​បណ្តា​បុណ្យចូលឆ្នាំនានាកន្លងមក។

អាជីវករនៅរាជធានីភ្នំពេញ ​ដែលនឹងចេញដើរកម្សាន្តនៅក្នុងអំឡុងថ្ងៃឈប់សំរាកបុណ្យ​ចូល​ឆ្នាំថ្មីប្រពៃណីខ្មែរឆ្នាំនេះ ​ភាគច្រើនគឺបានកក់បន្ទប់ស្នាក់នៅតាមសណ្ឋាគារ​ ផ្ទះសំណាក់ នៅ​តាមផ្ទះបឹងកាឡូរួចហើយ ដែលមានតម្លៃសមរម្យ ​ដោយពួកគាត់លើកឡើងថា ​បើមិនកក់ទុកមុន វាអាចឡើងថ្លៃនិងមិនអាចរកបន្ទប់ស្នាក់បានក្នុងអំឡុងពេលចូលឆ្នាំថ្មី។

តួលេខនាយកដ្ឋានសណ្ឋាគារ​ និងម្ហូបអាហារនៃក្រសួងទេសចរណ៍ ​បានឲ្យដឹងថា ​បច្ចុប្បន្ននៅតាម​គោលដៅ​ទេសចរណ៍សំខាន់ៗ​មានបន្ទប់ស្នាក់សណ្ឋាគារ ​ប្រមាណជាង ៥៥ ០០០បន្ទប់ ​ក្នុងនោះ នៅរាជធានីភ្នំពេញ ​មានជាង១៤ ០០០បន្ទប់សណ្ឋាគារ ​នៅខេត្តសៀមរាប ​មានប្រមាណ១៥ ០០០បន្ទប់សណ្ឋាគារ និងនៅខេត្តព្រះសីហនុ ​មានប្រមាណ ៨ ០០០បន្ទប់សណ្ឋាគារ​ នៅកំពត មានជាង ១៣ ០០បន្ទប់សណ្ឋាគារ ។

ក្រៅពីនេះគឺមានបន្ទប់ស្នាក់នៅតាមផ្ទះសំណាក់ ​និងផ្ទះបឹងកាឡូ រាប់ម៉ឺនបន្ទប់ទៀត ដែលអាច​ទ្រទ្រង់​គ្រប់គ្រាន់ភ្ញៀវដើរកម្សាន្តថ្ងៃបុណ្យចូលឆ្នាំថ្មី ​និងព្រឹត្តិការណ៍SEA GAMES និងAsean PARA GAMES2023នេះ៕ អត្ថបទ ស៊ុម សុខជា