ប្រភពដឹងពីបញ្ហានេះ បានប្រាប់សារព័ត៌មានរ៉យទ័រនៅថ្ងៃព្រហស្បតិ៍នេះ(១៣ មេសា)ថា ទីភ្នាក់ងារប្រឆាំងឧក្រិដ្ឋកម្មហិរញ្ញវត្ថុរបស់ប្រទេសឥណ្ឌា បានបើកការស៊ើបអង្កេតលើការចោទ​ប្រកាន់ពីបទរំលោភលើច្បាប់ប្តូរប្រាក់បរទេសដោយសាជីវកម្មផ្សព្វផ្សាយអង់គ្លេស BBC ។

ការស៊ើបអង្កេតនេះ កើតឡើងប៉ុន្មានខែបន្ទាប់ពីអាជ្ញាធរពន្ធដារ បានឆែកឆេរការិយាល័យរបស់​ស្ថានីយ​ផ្សព្វផ្សាយអង់គ្លេសនៅទីក្រុងមុមបៃ​ និងញូវដេលី។

ប្រភពដដែល បានបន្តថា ទីភ្នាក់ងារឥណ្ឌា អគ្គនាយកដ្ឋានអនុវត្តន៍ច្បាប់(ED) បានចេញ​សេចក្តី​ជូនដំណឹង​មួយទៅកាន់សាជីវកម្មផ្សព្វផ្សាយអង់គ្លេស​ BBC កាលពីខែមីនា ហើយបានសាក​សួរ​បុគ្គលិកមួយចំនួននៅដើមខែនេះ។

អ្នកនាំពាក្យរបស់អគ្គនាយកដ្ឋានអនុវត្តន៍ច្បាប់ ED ​មិនបានឆ្លើយតបភ្លាមៗចំពោះការហៅទូរស័ព្ទ និង​សារជាអក្សរស្នើរសុំការអត្ថាធិប្បាយទេ។ ចំណែកឯសាជីវកម្មផ្សព្វផ្សាយអង់គ្លេស BBC ក៏មិន​បានឆ្លើយតបភ្លាមៗចំពោះសារអេឡិចត្រូនិកស្នើរសុំការអត្ថាធិប្បាយដែរ។