អន្ដរជាតិ៖ ហ្គាណា គឺជាប្រទេសដំបូងគេ អនុម័តឲ្យប្រើប្រាស់វ៉ាក់សាំងបង្ការជំងឺគ្រុនចាញ់ប្រភេទថ្មី ដែលត្រូវបានចាត់ទុក ថាជា “វ៉ាក់សាំងផ្លាស់ប្តូរពិភពលោក” ដោយក្រុមអ្នកវិទ្យាសាស្រ្តដែលផលិតវ៉ាក់សាំងនេះ។  

វ៉ាក់សាំង R21 ទំនងជាមានប្រសិទ្ធិភាពខ្ពស់ គឺផ្ទុយស្រឡះនឹងវ៉ាក់សាំងលើកមុនៗដែលផលិតឡើងដូចគ្នា។  ក្រុមនិយ័តករហ្គាណា បានវាយតម្លៃទិន្នន័យសាកល្បងចុងក្រោយលើសុវត្ថិភាព និងប្រសិទ្ធិភាពរបស់វ៉ាក់សាំង ដែលមិនទាន់ត្រូវបានចេញផ្សាយជាសាធារណៈនៅឡើយទេ ហើយពួកគេបានសម្រេចចិត្តប្រើប្រាស់វាតែម្តង។  

ស្របពេលនោះដែរ អង្គការសុខភាពពិភពលោក(WHO)កំពុងពិចារណាលើការអនុម័តវ៉ាក់សាំងនេះ។  

 គួរឲ្យដឹងថា ជំងឺគ្រុនចាញ់ បានសម្លាប់មនុស្សប្រហែល ៦២ម៉ឺននាក់ជារៀងរាល់ឆ្នាំ ដែលភាគច្រើននៃពួកគេ គឺជាកុមារតូចៗ ។  

វាគឺជាការងារផ្នែកវិទ្យាសាស្រ្តដ៏លំបាកមួយមានរយៈពេល១សតវត្សរ៍ ក្នុងការផលិតវ៉ាក់សាំងដែលអាចការពាររាង កាយមនុស្សពីប៉ារ៉ាសិតគ្រុនចាញ់។  

ទិន្នន័យសាកល្បងពីការសិក្សាដំបូងនៅប្រទេសប៊ូគីណា ហ្វាសូ បង្ហាញថា វ៉ាក់សាំង R21មានប្រសិទ្ធិភាពរហូតដល់ ៨០ភាគរយ ពេលចាក់ ៣ដូសដំបូង និងដូសជំរុញមួយដូសនៅរយៈពេល ១ឆ្នាំក្រោយ៕