ជនអន្តោប្រវេសន៍រាប់រយនាក់ បានសម្រុកចូលទៅកាន់ព្រំដែនសហរដ្ឋអាមេរិកពីប្រទេសម៉ិកស៊ិក កាលពីថ្ងៃពុធ និងព្រឹកថ្ងៃព្រហស្បតិ៍ ទី១៣ ខែមេសា ដោយបង្វែរពួកគេ ទៅកន្លែងល្បាតព្រំដែនសហរដ្ឋអាមេ រិក ក្នុងបំណងចូលសហរដ្ឋអាមេរិក។

នៅក្នុងទីក្រុងព្រំដែន Ciudad Juarez ជនអន្តោប្រវេសន៍ បានសម្រេចចិត្តឆ្លងកាត់ បន្ទាប់ពីបានឮពាក្យចចាមអារ៉ាមថា ការល្បាតព្រំដែនមានការណែនាំមិនឱ្យនិរទេសមនុស្ស ហើយពួកគេនឹងត្រូវបានអនុញ្ញាតឱ្យឆ្លងចូលសហរដ្ឋអាមេរិក។ ទោះជាយ៉ាងណា អ្នកល្បាតព្រំដែនបាននិយាយឡើងវិញថា លក្ខខណ្ឌសម្រាប់ការឆ្លងកាត់នៅតែដដែល ហើយមានតែអ្នកដែលមានការណាត់ជួបដែលបានដំណើរការតាមរយៈកម្មវិធី CBP One ប៉ុណ្ណោះដែលនឹងត្រូវបានទទួលយក។

នាង Reyna Fernandez ជនអន្តោប្រវេសន៍ក្នុងតំបន់ បានប្រាប់សារព័ត៌មានរ៉យទ័រថា កម្មវិធីរដ្ឋាភិ   បាលសហរដ្ឋអាមេរិក CBP ONE ដើម្បីស្នើសុំសិទ្ធិជ្រកកោនមានការណាត់ជួបតិចតួចប៉ុណ្ណោះ។ ក្រោយមកនាងបានបង្វែរខ្លួន និងកូនទៅកាន់កន្លែងល្បាតព្រំដែនអាមេរិក។ លោក William Suarez ជនអន្តោប្រវេសន៍ម្នាក់ទៀត ដែលបានសម្រេចចិត្តដើរត្រឡប់ទៅប្រទេសម៉ិកស៊ិកវិញ បន្ទាប់ពីដឹងថាពាក្យចចាមអារ៉ាមនេះមិនពិត បាននិយាយថា ឯកសារទី៤២ នៅតែមានសុពលភាព ហើយពួកគេមិនអនុញ្ញាតឱ្យនរណាម្នាក់ឆ្លងកាត់ព្រំដែននោះទេ។

ក្នុងចំណោមការលំបាកនានា ដែលជនអន្តោប្រវេសន៍ប្រឈមមុខ ដោយរង់ចាំឱកាសដើម្បីឆ្លងកាត់ទៅផ្នែកសហរដ្ឋអាមេរិក គឺការភ័យខ្លាចនៃការចាប់ខ្លួនដោយស្ថាប័នអន្តោប្រវេសន៍ប្រទេសម៉ិកស៊ិក បន្ទាប់ពីមានអគ្គិភ័យដែលបានបណ្តាលឲ្យជនអន្តោប្រវេសន៍ ៤០នាក់ស្លាប់ នៅក្នុងការឃុំឃាំងកាលពីខែមីនា។ សម្រាប់លោក Olivier Dubois ប្រធានប្រចាំប្រទេសម៉ិកស៊ិក និងអាមេរិកកណ្តាលទទួលបន្ទុកគណៈកម្មាធិការអន្តរជាតិរបស់កាកបាទក្រហម បាននិយាយថាសោកនាដកម្មអគ្គិភ័យ គឺជាពេលមួយដើម្បីពិចារណាជម្រើសសម្រាប់ជនអន្តោប្រវេសន៍ដែលកំពុងស្វែងរកសេរីភាព។