បាត់ដំបង៖ នាឱកាសពិធីបុណ្យចូលឆ្នាំប្រពៃណីជាតិខ្មែររយៈពេល៣ថ្ងៃចាប់ពីថ្ងៃទី១៤-១៦ ខែមេសា ឆ្នាំ២០២៣ មានភ្ញៀវទេសចរសរុបជាង១លាន៥សែននាក់បានធ្វើដំណើរ​កម្សាន្ត​នៅ​ទូទាំង​ខេត្តបាត់ដំបង។

លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង បានថ្លែងឱ្យដឹងថា ភ្ញៀវទេសចរ​ដែលមកកម្សាន្តក្នុងខេត្តបាត់ដំបង សរុបទាំង៣ថ្ងៃមានចំនួន១ ៥០០ ១៦៨ នាក់​ កើនឡើង ១៦៥.២៣% បើប្រៀបធៀបរយៈពេលដូចគ្នា ​ក្នុងឆ្នាំ២០២២ មាន ៥៦៥,៦១៨ នាក់ ។ ក្នុងនោះ​ចំនួនភ្ញៀវទេសចរជាតិ ១ ៤៩៧ ៤២១ នាក់ កើនឡើង ១៦៥.២៦% បើប្រៀបធៀបរយៈពេលដូចគ្នា ក្នុងឆ្នាំ២០២២ មាន ៥៦៤ ៥០៧ នាក់ ចំណែកចំនួនភ្ញៀវទេសចរអន្តរជាតិ ២ ៧៤៧ នាក់ កើនឡើង ១៤៧.២៥% បើប្រៀបធៀបរយៈពេលដូចគ្នា ក្នុងឆ្នាំ២០២២ មាន ១,១១១ នាក់។

លោក ហម អរុណ បានឱ្យដឹងបន្ថែមថា ក្រុងបាត់ដំបង វត្តអារាមនានាក្នុងខេត្ត ព្រមទាំង​បណ្តា​រមណីយដ្ឋាន​សំខាន់ៗក្នុងខេត្ត បានរៀបចំព្រឹត្តិការណ៍ទេសចរណ៍ ដូចជា ពិធីសង្ក្រាន្តបាត់ដំបង, ការប្រគំតន្ត្រី, ការតាំងពិព័រណ៍, តំបន់ត្រជាក់ចិត្ត-ល- នាំឱ្យលំហូរភ្ញៀវទេសចរមានការកើន​ឡើងគួរកត់សម្គាល់៕