សៀមរាប៖ នៅព្រឹកថ្ងៃទី១៧ខែមេសានេះ ពលរដ្ឋនៅខេត្តសៀមរាប បានសម្រុកទៅជិះរថយន្ត​ក្រុងសាធារណៈ ស្ថិតនៅទីតាំងមណ្ឌលរដ្ឋបាលមន្ទីរខេត្តសៀមរាប ក្នុងគោលបំណងធ្វើដំណើរ​ត្រលប់​ទៅរាជធានីភ្នំពេញវិញ បន្ទាប់ពីបញ្ចប់ពិធីបុណ្យចូលឆ្នាំថ្មី ប្រពៃណីជាតិ។

នៅក្នុងឱកាសនោះ ពួកគាត់បានលើកឡើងថា ការសម្រេច​មកជិះរថយន្តក្រុងសាធារណៈនា​ពេលនេះ ​គឺដើម្បីសុវត្ថិភាពក្នុងពេលធ្វើដំណើរ ​និងកាត់បន្ថយការចំណាយ​បានមួយកំរិតផងដែរ។ លើសពីនេះ ពួកគាត់បានសម្ដែង​ការសប្បាយចិត្ត និងអរគុណ ដល់សម្តេចតេជោ ហ៊ុន សែន​ នាយករដ្ឋមន្រ្តី​ ដែល​សម្រេច​អោយរថយន្ត​ក្រុង​សាធារណៈដឹក​ពលរដ្ឋដោយមិនគិត​ថ្លៃ​ក្នុង​ឱកាសពិធីបុណ្យចូលឆ្នាំ។

អនុវត្តតាមប្រសាសន៍ដឹកនាំ​របស់​សម្តេចតេជោ ហ៊ុន សែន នាយករដ្ឋមន្រ្តីកម្ពុជា ​រដ្ឋបាលរាជធានី​ភ្នំពេញ​បានរៀបចំរថយន្តក្រុងសាធារណៈចំនួនជាង ៣០០គ្រឿង ​សម្រាប់​បម្រើសេវា​ដឹកជញ្ជូន​សាធារណៈរយៈពេល៦ថ្ងៃ ​ចាប់ពីថ្ងៃទី១៣ដល់ថ្ងៃទី ១៧ខែមេសា ​ឆ្នាំ២០២៣ ​ដោយឥតគិតថ្លៃ ដើម្បី​ជួយ​សម្រួលដល់ការចំណាយជូនដល់ប្រជាពលរដ្ឋក្នុងការធ្វើដំណើរទៅលេងស្រុកកំណើត ជួបជុំប្អូនក្រុមគ្រួសារ ​ក្នុងឱកាសពិធីបុណ្យចូលឆ្នាំថ្មី ​ប្រពៃណីជាតិ។

សម្រាប់​សេវាដឹកជញ្ជូន​ប្រជាពលរដ្ឋពីរាជធានីភ្នំពេញ​ទៅខេត្តសៀមរាប ​និង​ពី​សៀមរាបទៅ​រាជធានី​ភ្នំពេញ មានរថយន្តក្រុងចំនួន ១០០គ្រឿង ធ្វើដំណើតាមផ្លូវជាតិលេខ៦ មាន​ចំងាយ​ផ្លូវជាង ៣០០គីឡូម៉ែត្រ ៕ អត្ថបទ៖ ទូច សោភ័ណ