កោះកុង៖ ខេត្តកោះកុង បានទទួលភ្ញៀវទេសចរជាតិ និងអន្តរជាតិប្រមាណ ១ម៉ឺន៦ពាន់នាក់ អំឡុងពិធីបុណ្យចូលឆ្នាំថ្មី ប្រពៃណីជាតិខ្មែរ រយៈពេល៣ថ្ងៃ។ តួលេខទេសចរនៅពេលនេះ បានថយចុះជាង២ម៉ឺននាក់ បើធៀបនឹងឆ្នាំទៅ។

លោក សុខ ចាន់គ្រឹះស្នា ប្រធានមន្ទីរទេសចរណ៍ខេត្តកោះកុង បានឱ្យដឹងនៅថ្ងៃទី១៧ ខែមេសា ឆ្នាំ២០២៣ថា ​អំឡុងពេលពិធីបុណ្យចូលឆ្នាំថ្មី ប្រពៃណីជាតិខ្មែរ ៣ថ្ងៃ មានទេសចរជាតិសរុប ១ម៉ឺន៥.៩៨០នាក់ រីឯទេសចរបរទេសមានចំនួន ៣២៦នាក់ សរុបទាំង១ម៉ឺន៦ពាន់នាក់ ដែល​បានមកលេងកម្សាន្តនៅក្នុងខេត្តកោះកុង។

ទោះយ៉ាងណាមន្រ្តីជំនាញអះអាងថា តួលេខចំនួនអ្នកទេសចរបានថយថយ ២ម៉ឺន២.៤៩៨នាក់ បើធៀបនឹងរយៈពេលដូចគ្នាកាលពីឆ្នាំ២០២២។ ​ការដែលនាំឱ្យចំនួនអ្នកទេសចរថយចុះបែបនេះ ដោយសារតែកំណាត់ផ្លូវជាតិលេខ៤៨ ​កំពុងស្ថិតនៅក្នុងដំណាក់កាលបើកការដ្ឋានស្ថាបនាថ្មី។

លោក សុខ ចាន់គ្រឹះស្នា បន្ថែមថា សេវាកម្មដឹកអ្នកដំណើរ ភោជនីយដ្ឋាន អាហារដ្ឋាន សណ្ឋាគារ ផ្ទះសំណាក់មួយចំនួនបានដំឡើងថ្លៃ តែក៏មានការយល់ព្រមទទួល​យក​សេវា​កម្មពី​ភ្ញៀង​ទេសចរផងដែរ។

ក្រុមអ្នកទេសចរមកពីរាជធានីភ្នំពេញ និងពលរដ្ឋរស់នៅក្នុងក្រុងខេមរភូមិន្ទ សុទ្ធតែបានលើកឡើង​ពី​បញ្ហាសន្តិសុខសណ្តាប់ធ្នាប់ល្អ ពិសេសការរៀបចំកម្មវិធីសប្បាយជាច្រើនប្លែកជាងបណ្តាឆ្នាំមុន។

ដោយឡែកលោកឧត្តមសេនីយ៍ទោ គង់ មនោ ស្នងការនគរបាលខេត្តកោះកុង​ ក៏បង្ហាញដែរថា បញ្ហា​សន្តិសុខសណ្តាប់ធ្នាប់អំឡុងពិធីបុណ្យចូលឆ្នាំខ្មែរ ​៣ថ្ងៃនេះ ប្រព្រឹត្តទៅដោយភាព​ល្អ​ប្រសើរនោះទេ ពោលគឺគ្រាន់តែមានបញ្ហាគ្រោះថ្នាក់​ចរាចរណ៍ចំនួន៣ករណី ព្រោះតែខ្វះការ​ប្រុង​ប្រយ័ត្នប៉ុណ្ណោះ។

បើតាមលោកស្នងការនគរបាលខេត្តកោះកុង​ កងកម្លាំងរបស់លោក និងអាជ្ញាធរសមត្ថកិច្ចពាក់ព័ន្ធ​បានគ្រប់គ្រងស្ថានការណ៍បានរលូន ​និងយកចិត្តទុកដាក់ខ្ពស់លើការងារ​ថែរក្សាការពារ​សន្តិសុខ​សុវត្ថិភាពជូនប្រជាពលរដ្ឋ និងអ្នកទេសចរដែលមកលេងកម្សាន្តនៅកន្លែងប្រារព្ធកម្មវិធីសប្បាយៗ និងតំបន់ទេសចរណ៍ដ៏ទៃទៀត៕អត្ថបទ៖ ឈឹម មករា