ក្រុមអ្នកតវ៉ាបានមកប្រមូលផ្តុំគ្នានៅទីក្រុងប៉ារីសភាគកណ្តាល នៅខាងក្រៅសាលាក្រុងទី១០ កាលពីល្ងាចថ្ងៃចន្ទទី១៧ ខែមេសា ដើម្បីបង្កើនសំឡេងឡូឡាខ្លាំងៗ ខណៈប្រធានាធិបតីបារាំងលោក Emmanuel Macron កំពុងថ្លែងសុន្ទរកថាតាមទូរទស្សន៍ជាតិ។

ក្រុមបាតុកររាប់រយនាក់បានស្រែកពាក្យប្រឆាំងលោក Macron ខណៈកំពុងវាយឆ្នាំង និងឆ្នាំងខ្ទះ។

លោក Macron បានថ្លែងសុន្ទរកថាទៅកាន់ប្រជាជាតិ ពីរថ្ងៃបន្ទាប់ពីការចុះហត្ថលេខាលើផែនការច្បាប់ដើម្បីបង្កើនអាយុចូលនិវត្តន៍រយៈពេល២ឆ្នាំបន្ថែមពីអាយុ៦២ឆ្នំា រហូតដល់៦៤ ឆ្នាំ។ ការតវ៉ាមានរយៈពេលតិចជាងមួយម៉ោង ដែលអ្នកតវ៉ាមួយចំនួនបានដុតធុងសំរាម ខណៈពួកគេដើរចេញ។

នៅក្នុងសុន្ទរកថា ប្រធានាធិបតីបារាំង លោក Emmanuel Macron បានផ្តល់ឱកាសឲ្យខ្លួនលោករយៈពេល១០០ ថ្ងៃដើម្បីស្តារប្រទេសឡើងវិញបន្ទាប់ពីការតវ៉ាជាច្រើនសប្តាហ៍ និងការផ្ទុះកំហឹងចំពោះផែនការដែលពុំសូវមានការគាំទ្ររបស់លោកក្នុងការបង្កើនអាយុចូលនិវត្តន៍ ដោយសុំឱ្យរដ្ឋាភិបាលរបស់លោកបើកការពិភាក្សាជាមួយសហជីពលើបញ្ហាជាច្រើន។ នៅក្នុងសុន្ទរកថាតាមទូរទស្សន៍ លោក Macron បាននិយាយថាលោកចង់ឱ្យនាយករដ្ឋមន្ត្រីរបស់លោកស្នើវិធានការលើលក្ខខណ្ឌការងារ ច្បាប់ និងសណ្តាប់ធ្នាប់ ការអប់រំនិងបញ្ហាសុខភាព។