ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជា​ប្រធានគណៈកម្មាធិការជាតិ CAMSOC-CAMAPGOC មានប្រសាសន៍ថា​ ទីលានប្រកួតនានា សម្រាប់ការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម ​លើកទី១២​ ឆ្នាំ២០២៣ បានចប់សព្វគ្រប់រៀបរយអស់ហើយ នៅសល់តែការតុបតែង ដើម្បីលើកសោភណ្ឌភាព​កន្លែង​ប្រកួតតែប៉ុណ្ណោះ,។ នេះជាការបញ្ជាក់របស់សម្តេចពិជ័យសេនា ទៀ បាញ់ ក្រោយការ​ចុះត្រួត​ពិនិត្យ​ទីលានប្រកួត​ នៅមជ្ឈមណ្ឌលកីឡាកងយោធពលខេមរភូមិន្ទ (ស្តាតចាស់)​ នាព្រឹកថ្ងៃទី១៩ ខែមេសា។

សម្តេចពិជ័យសេនា ទៀ បាញ់ មានប្រសាសន៍ថា ពេលវេលាជិតមកដល់ហើយ ដូច្នេះគ្រប់​គណៈកម្មការក៏ដូចជាគ្រប់ផ្នែកនានា កំពុង​មហាញឹកមែនទែន ​ក្នុងការត្រួតពិនិត្យគ្រប់ផ្នែក គ្រប់​វិស័យទាំងអស់ ជាពិសេសគឺទីលានប្រកួត ត្រូវតែរួចរាល់មុនអ្វីៗទាំងអស់​ ដើម្បីធានាឱ្យបានស្អាត អនាម័យ ព្រមទាំងត្រឹមត្រូវតាមស្តង់ដាអន្តរជាតិផងដែរ។ ជារួម គឺគ្រប់ទិសទីទាំងអស់ យើងបាន​ត្រួត​ពិនិត្យជាបន្តបន្ទាប់រួចរាល់ចប់សព្វគ្រប់អស់ហើយ ​ដោយនៅសល់តែការសម្អាតអនាម័យ តុបតែងស្លាកសញ្ញា ​និមិត្តសញ្ញា ​ឱ្យកាន់តែស្រស់ប្រិមប្រិយប៉ុណ្ណោះ។

គួរបញ្ជាក់ថា ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នេះមានប្រទេសចំនួន១១​ចូលរួម​ប្រកួតប្រជែងលើប្រភេទកីឡាចំនួន៣៧ ស្មើនឹង ​៥៨១វិញ្ញាសា ដែលត្រូវបានអនុម័តដោយ​ក្រុម​ប្រឹក្សាសហព័ន្ធកីឡាអាស៊ីអាគ្នេយ៍ ហើយព្រឹត្តិការណ៍​ស៊ីហ្គេមនេះ ​នឹងដំណើរការជាផ្លូវការ ពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣។

ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ​សម្រាប់ក្រុមអត្តពលិកជនពិការ នឹង​ដំណើរការជាផ្លូវការពីថ្ងៃទី០៣​ ដល់ថ្ងៃទី០៩ ខែមិថុនា ឆ្នាំ២០២៣ ដោយមាន១៣ប្រភេទ​កីឡា​ស្មើនឹង ៤៣១វិញ្ញាសា។ ចំពោះប្រតិភូកីឡាទាំង១១ប្រទេស រួមទាំងម្ចាស់ផ្ទះកម្ពុជា ដែលត្រៀម​ចូលរួម​ប្រកួតប្រជែងមេដាយស៊ីហ្គេម-អាស៊ានប៉ារ៉ាហ្គេម ​ជាប្រវត្តិសាស្ត្រលើកដំបូង នៅកម្ពុជានេះ មានចំនួនសរុប១២៤០៤នាក់។

អ្វីដែលកត់សម្គាល់កម្ពុជាបានបង្កើតប្រវត្តិសាស្ត្រក្នុងស៊ីហ្គេមមិនធ្លាប់មានកន្លងមក​ ក្នុងនោះ ការ​សុំអគ្គិជ័យកីឡាពីព្រះអគ្គិអាទិទេព ​មិនឱ្យប្រទេសចូលរួមទាំងអស់បង់ថ្លៃចូលរួមប្រកួត មិនលក់​សិទ្ធផ្សាយ និងមិនលក់សំបុត្រគ្រប់ភេទកីឡាទាំងអស់ និងដង្ហែអគ្គិជ័យ​ និងគប់ភ្លើងស៊ីហ្គេម អាស៊ានប៉ារ៉ាហ្គេមទៅ​ គ្រប់ប្រទេសអាស៊ាន។ កាលពីស៊ីហ្គេម ២០១៩ កម្ពុជាក៏បង្កើត​ប្រវត្តិសាស្ត្រាស៊ីហ្គេម ដែរដោយកីឡាករបាល់ទាត់ សៀង ចន្ធា ក្លាយជាកីឡាករបាល់ទាត់​ក្មេងបំផុត​ ស៊ុតបញ្ចូលទីលឿនបំផុតមិនធ្លាប់មានក្នុងប្រវត្តិជាង៦០ឆ្នាំ៕