ភ្នំពេញ ៖ ក្រុមហ៊ុន ម៉េងលី ជេគួច អេដ្យូខេសិន បានរៀបចំកម្មវិធីរ៉ូដសូ ដើម្បីប្រកាសការបោះផ្សាយលក់មូលបត្រ​កម្មសិទ្ធិសាធារណៈលើកដំបូង នៅព្រឹកថ្ងៃទី១៩ ខែមេសា ឆ្នាំ២០២៣នេះ ក្នុងគោលដៅស្វែងរកថវិកា ដើម្បី​ពង្រីក​សាលាអន្តរទ្វីបអាមេរិកកាំង (AIS) ឲ្យឈានដល់ចំនួន ១៦០សាខា នៅទូទាំងប្រទេសកម្ពុជា។

​អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិកប្រធានក្រុមប្រឹក្សាភិបាល និងជាអគ្គនាយកប្រតិបត្តិ នៃក្រុមហ៊ុន ម៉េងលី ជេ គួច អេឌ្យូខេសិន ម.ក បានបញ្ជាក់ថា គោលដៅនៃការបោះផ្សាយលក់មូលបត្រកម្មសិទ្ខាងលើនេះ គឺដើម្បីបង្កើន​សេវាកម្មអប់រំឲ្យបានទូទាំងប្រទេស ទាំងកូនអ្នកមាន អ្នកក្រ អាចទទួលបានសេវាអប់រំពីសាលា ដោយចូលរួម​អភិវឌ្ឈន៍ និងគាំទ្រផ្សារមូលបត្រ ដែលជាសេនាធិការរបស់រដ្ឋាភិបាលឲ្យមានភាពរីកចម្រើន និងដើម្បីលើកស្ទួយ​សេដ្ឋកិច្ច និងការរីកចម្រើនផ្សារមូលបត្រកម្ពុជាដើម្បីបង្ហាញអ្នកវិនិយោគទូទាំងពិភពលោកថា សេដ្ឋកិច្ចកម្ពុជា​មានការរីកចម្រើនជារៀងរាល់ឆ្នាំ និងមានកំនើនខ្ពស់ជាងគេធៀបជាមួយបណ្តាប្រទេសផ្សេងៗ។

គោលបំណងចម្បងរបស់ក្រុមហ៊ុនម៉េងលី ជេ. គួច អេឌ្យូខេសិន ដែលដាក់ចេញការបោះផ្សាយ​លក់មូលបត្រកម្មសិទ្ធិ​សាធារណៈនេះ ដើម្បីផ្សព្វផ្សាយសាលា និងអនុញ្ញាតឲ្យវិនិយោគិនទាំងឡាយ មានឱកាសក្លាយជាផ្នែក​មួយរបស់​ក្រុម​ហ៊ុនដ៏ធំមួយនេះ។

គិតមកដល់បច្ចុប្បន្ននេះ វិទ្យាស្ថានភាសា និងវិទ្យាស្ថានអន្តរទ្វីបអាមេរិកកាំង មានសិក្សានុសិស្សចំនួនជាង ២ម៉ឺន​នាក់ និងមានបុគ្គលិកសរុបចំនួន ២ ២០០នាក់ ជាមួយនឹងផែនការពង្រីកសាខាចំនួន១៦០ និងចំនួនសិស្សានុសិស្ស​កើនឡើងដល់ ៥០ ទៅ៧៥ម៉ឺននាក់ នាពេលេអនាគត។

សូមបញ្ជាក់ថា នៅថ្ងៃទី៧ ខែមីនា ឆ្នាំ២០២៣ ផ្សារមូលបត្រកម្ពុជា បានសម្រេចឯកភាពជាគោលការណ៍ លើពាក្យ​ស្នើ​សុំពិនិត្យលទ្ធភាព អាចចុះបញ្ជីលក់មូលបត្រកម្មសិទ្ធិ និងនៅថ្ងៃទី២០ ខែមីនា ឆ្នាំ២០២៣ ផ្សារមូលបត្រ​កម្ពុជា​បានឯកភាពលើសំណើដាក់តម្លៃ ២០៨០ រៀលក្នុងមួយភាគ ហ៊ុន របស់ក្រុមហ៊ុន ម៉េងលី ជេ. គួច អេឌ្យូខេសិន។

បច្ចុប្បន្ន ផ្សារមូលបត្រកម្ពុជា​ មានក្រុមហ៊ុនសរុបចំនួន ១៨ ក្នុងនោះ ក្រុមហ៊ុនចំនួនប្រាំបួន បានចុះបញ្ជីភាគហ៊ុន ខណៈដែលក្រុមហ៊ុនដែលនៅសល់បោះផ្សាយមូលបត្របំណុល។ ក្រុមហ៊ុនបានប្រមូលទុនពីទីផ្សារសរុបចំនួន ៣១៧ លានដុល្លារ៕ អត្ថបទ៖ ឈិត បូរ៉ាវី​