ភ្នំពេញ៖ ក្រសួងព័ត៌មានបានប្រាប់ទៅអ្នកសារព័ត៌មានទាំងអស់ កុំឱ្យចូលយកព័ត៌មាននៅ«តំបន់ក្រហម» ដែលជាតំបន់ស្ថិតក្រោមការបិទខ្ទប់របស់អាជ្ញាធរ ដើម្បីទប់ស្កាត់ការឆ្លងរីករាលដាលនៃមេរោគកូវីដ-១៩។
ក្រសួងព័ត៌មាន បានបញ្ជាក់ពីការហាមឃាត់បែបនេះនៅក្នុងសេចក្ដីជូនដំណឹងមួយចេញនៅថ្ងៃនេះ។
ក្នុងសេចក្ដីជូនដំណឹងដដែលនេះ ក្រសួងព័ត៌មានបញ្ជាក់ថា អ្នកសារព័ត៌មានជាតិ និងអ្នកសារព័ត៌មានបរទេសមួយចំនួន បានចុះយកព័ត៌មាន និងផ្សាយផ្ទាល់អំពីសកម្មភាពនានានៅតំបន់បិទខ្ទប់ក្នុងភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្ដាល។
ក្រសួងបញ្ជាក់ទៀតថា អ្នកសារព័ត៌មានមួយចំនួនបានផ្សាយផ្ទាល់ និងធ្វើអត្ថាធិប្បាយផ្សេងៗដោយគ្មានមូលដ្ឋានច្បាស់លាស់ទាក់ទងនឹងបច្ចេកទេសសុខាភិបាលនោះឡើយ។
ក្រសួងបញ្ជាក់ថា ការផ្សាយផ្ទាល់ និងការធ្វើអត្ថាធិប្បាយដោយគ្មានមូលដ្ឋានច្បាស់លាស់បែបនេះ បង្កឱ្យមហាជន«យល់ច្រឡំ» និង«ភាពជ្រួលច្របល់ក្នុងសង្គម» ហើយប្រឈមមុខនឹងការឆ្លងរីករាលដាលនៃមេរោគកូវីដ-១៩។
បញ្ជាក់ថា៖ «ដើម្បីរក្សាសុវត្ថិភាពសង្គម និងទប់ស្កាត់ការឆ្លងរាលដាលជំងឺកូវីដ-១៩ ទៅក្នុងសហគមន៍ ក្រសួងព័ត៌មានសូមធ្វើការណែនាំដល់អ្នកសារព័ត៌មានទាំងអស់ បញ្ឈប់រាល់សកម្មភាពខាងលើនេះ»។
ក្រសួងព័ត៌មានព្រមានថា ប្រសិនបើអ្នកសារព័ត៌មាននៅតែបំពាននឹងសេចក្ដីជូនដំណឹងនេះ ពួកគេនឹងទទួលខុសត្រូវចំពោះច្បាប់៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
