អាមេរិក ៖ យោងតាមការអះអាងរបស់ប្រធានការិយាល័យ All-domain Anomaly Resolution នៃមន្ទីរបច្ចកោណ បានឲ្យដឹងថា រដ្ឋាភិបាលសហរដ្ឋអាមេរិក នឹងបន្តតាមដានករណីថាសហោះ(UFO)ដ៏មានសក្តានុពលជាង ៦៥០ករណី ។ 

លោក Kirkpatrick បាននិយាយប្រាប់អនុគណៈកម្មាធិការយោធសេវាព្រឹទ្ធសភាកាលពីថ្ងៃពុធថា ចំនួនករណីថា​ស​ហោះ​ ទទួលបានពីរបាយការណ៍ចំនួន៣៥០ ដោយយោងទៅលើរបាយការណ៍ចារកម្មដែលអាចផ្សព្វផ្សាយបា​នជា​ទូទៅពាក់ព័ន្ធនឹងបាតុភូតអាកាសគ្មានអត្តសញ្ញាណពិតប្រាកដឬថាសហោះ​ ដែលត្រូវបាន​បញ្ចេញកាល​ពីដើមឆ្នាំ​នេះ ។ 

លោក Kirkpatrick និយាយថា នៅក្នុងចំណោមករណីថាសហោះជាង ៦៥០ករណី ពួកយើងបាន​កំណត់អាទិភាព​ប្រហែលពាក់កណ្តាលនៃពួកវាថាមានតម្លៃគួរឲ្យចាប់អារម្មណ៍ខ្លាំង ហើយបច្ចុប្បន្នពួកយើងត្រូវតែលម្អិតពីវា ហើយ​និង​ត្រូវលម្អិតថាតើចំនួនប៉ុន្មាននៃពួកវា ដែលជាទិន្នន័យពិតប្រាកដ? 

លោក Kirkpatrick បញ្ជាក់ប្រាប់ក្រុមតំណាងរាស្រ្តពីវិធីដែលការិយាល័យរបស់លោកជួយមន្ទីរបច្ចកោណ និង​សហគមន៍​ចារកម្ម ក្នុងការកំណត់បច្ចេកវិទ្យាបរទេសលេចធ្លោ រួមទាំងតួនាទីរបស់លោក​ក្នុងការជួយកំណត់​អត្តសញ្ញាណបាឡុងឈ្លបការណ៍រយៈកម្ពស់ខ្ពស់របស់ចិន ដែលបានហោះរំលងដែនអាកាសសហរដ្ឋអាមេរិក កាលពីខែកុម្ភៈ ។ 

លោកបានបញ្ចេញវីដេអូករណីថាសហោះ ២ករណី ដែលត្រូវបានបញ្ចេញផ្សព្វផ្សាយ ក្នុងនោះករណីថាសហោះមួយ ត្រូវបានស្រាយបំភ្លឺ ហើយករណីមួយទៀត ពុំត្រូវបានស្រាយបំភ្លឺនោះទេ ។ 

វីដេអូទី ១ឃើញវត្ថុតូចមួយដែលហោះឆ្លងកាត់អេក្រង់កាមេរ៉ាយានដ្រូន MQ-9 នៅតំបន់មជ្ឈិមបូព៌ា កាលពីឆ្នាំ ២០២២ ។ កាមេរ៉ាយានដ្រូន បានតាមចាប់យករូបភាពវត្ថុពេលដែលវាហោះឆ្លងកាត់ផ្ទៃមេឃ ហោះចូល និង​ហោះចេញកញ្ចក់អេក្រង់ ។ 

លោក Kirkpatrick បានពន្យល់ថា ករណីមួយនេះ មិនត្រូវបានស្រាយបំភ្លឺនោះទេ ដោយសារតែវាពុំមាន​ភស្តុតាង​អ្វីទៀតក្រៅពីវីដេអូ ។ លោកថា យើងមិនអាចបញ្ជាក់អត្តសញ្ញាណឲ្យបានច្បាស់លាស់នោះទេ ដោយសារតែ​វាផ្អែកលើតែវីដេអូ ហើយលោកសង្ឃឹមថា ពេលដែលទិន្នន័យជាច្រើនទៀត ត្រូវប្រមូលបានលើរឿងរ៉ាវទាំងអស់នេះ គំរូអាចនឹងបញ្ចេញផ្សព្វផ្សាយដើម្បីជួយពន្យល់ករណីថាសហោះដែលពុំត្រូវបានស្រាយបំភ្លឺមួយនេះ ។ 

នៅក្នុងវីដេអូទី ២ ដែលថតបានពីតំបន់អាស៊ីខាងត្បូងកាលពីដើមឆ្នាំនេះ ឃើញវត្ថុហោះឆ្លងកាត់យានដ្រូន MQ-9 ២គ្រឿង ដែលរួមទាំងយានដ្រូនមួយគ្រឿងថតបានវីដេអូ ឃើញមានដានផ្លូវហោះនៅពីក្រោយវា ដែលលោក Kirkpatrickនិយាយថា វាពិតជាចម្លែក ៕ ដោយ ៖ សារ៉ាត់