ភ្នំពេញ ៖ សហភាពសហព័ន្ធយុវជនកម្ពុជា បានទទួលអំណោយពីក្រុមហ៊ុនភេសជ្ជៈកម្ពុជា កូកា-កូឡា ចំនួន ១០,០០០កញ្ចប់ សម្រាប់ចែកជូនដល់បងប្អូនកម្មករ កម្មការិនីរោងចក្រ ដែលរស់នៅតំបន់ក្រហម ក្នុងរាជធានីភ្នំពេញ ដែលត្រូវបានបិទខ្ទប់ ដើម្បីទប់ស្កាត់ការឆ្លងរីករាលដាលជំងឺកូវីដ-១៩ ក្នុងរាជធានីភ្នំពេញ។

​

ពិធីប្រគល់-ទទួលនេះ ធ្វើនៅសាលាខណ្ឌឬស្សីកែវ នាព្រឹកថ្ងៃទី៤ ឧសភា ២០២១នេះ ក្រោមវត្តមាន ឯកឧត្តមបណ្ឌិត សាយ សំអាល់ អនុប្រធានសហភាពសហព័ន្ធយុវជនកម្ពុជា លោក ដេវីដ វីងហ្គល់វើត នាយកប្រតិបត្តិក្រុមហ៊ុនភេសជ្ជៈកម្ពុជា (កូកា-កូឡា) និងលោក កាំង ម៉ូនីកា អគ្គលេខាធិការរង នៃសមាគមរោងចក្រកាត់ដេរកម្ពុជា (GMAC)។ កញ្ចប់ស្បៀង នឹងត្រូវដឹកជញ្ជូនទៅតំបន់ក្រហម ក្នុងខណ្ឌមានជ័យ ខណ្ឌកំបូល ខណ្ឌពោធិ៍សែនជ័យ ខណ្ឌឬស្សីកែវ និងខណ្ឌសែនសុខ ដែលកម្មករ កម្មការិនី ត្រូវបានបង្គាប់មិនឱ្យចេញក្រៅ ហើយអាជីវកម្មទាំងអស់រួមទាំងហាងលក់អាហារត្រូវបានផ្អាកមិនឱ្យដំណើរការ។

កញ្ចប់ស្បៀងជំនួយរួមមាន៖

·      កូកា-កូឡាកាហ្វេ ១០.០០០ កេស

·      អង្ករ ១៥០ តោន

·      ត្រីខកំប៉ុង ១០.០០០ យួរ

·      ទឹកត្រីទឹកស៊ីអ៊ីវ ៣.៣៤៦ ដប

·      ម៉ាស ១០.០០០ ប្រអប់

·      សាប៊ូ ១០.០០០ ដុំ

កញ្ចប់នីមួយៗ រួមមាន កូកា-កូឡាកាហ្វេ ១កេស អង្ករ១៥គីឡូក្រាម ត្រីខ ១០កំប៉ុង ទឹកត្រី ១ដប ទឹកស៊ីអ៊ីវ ១ដប ម៉ាស ១ប្រអប់ និងសាប៊ូ ១ដុំ។ ស្បៀង ១០,០០០ កញ្ចប់នេះ ត្រូវបានរំពឹងទុកថា នឹងអាចជួយដោះស្រាយការលំបាករបស់កម្មករ កម្មការិនី ដែលកំពុងជាប់គាំងនៅក្នុងតំបន់បិទខ្ទប់ក្នុងខណ្ឌទាំង៥ ក្នុងរាជធានីភ្នំពេញ។

លោក ដេវីដ វីងហ្គល់វើត នាយកប្រតិបត្តិក្រុមហ៊ុនភេសជ្ជៈកម្ពុជា (កូកា-កូឡា) បានមានប្រសាសន៍ថា សហគមន៍យើងឥឡូវនេះកំពុងជួបការលំបាកខ្លាំងជាងពេលណាៗទាំងអស់ ដោយសារចំនួននៃការឆ្លងជំងឺកូវីដ-១៩ បានកើនឡើងយ៉ាងខ្លាំងក្នុងរយៈពេលដ៏ខ្លី បង្ខំឱ្យមានការបិទខ្ទប់ ដើម្បីទប់ស្កាត់ការឆ្លងរីកដាល នៃជំងឺដ៏កាចសាហាវនេះ។ ផលប៉ះពាល់ នៃការបិទខ្ទប់មានភាពខុសគ្នាអាស្រ័យតាមកម្រិតជីវភាពរបស់ប្រជាជន។ ក្នុងនោះកម្មករស្ថិតនៅក្នុងក្រុមងាយរងគ្រោះបំផុតដែលនេះជាមូលហេតុនាំឱ្យយើងសម្រេចចិត្តចូលរួមក្នុងកិច្ចខិតខំប្រឹងប្រែង ដើម្បីកាត់បន្ថយការលំបាករបស់ពួកគាត់ ដោយសហការជាមួយ ស.ស.យ.ក GMAC និងអាជ្ញាធរមូលដ្ឋាន។

លោក បានបញ្ជាក់ទៀតថា សហគមន៍របស់យើង ជាសហគមន៍ដែលបានគាំទ្រអាជីវកម្មយើងអស់រយៈពេល៣០ឆ្នាំកន្លងមកនេះ ហើយពេលនេះសហគមន៍កំពុងជួបការលំបាក និងត្រូវការជំនួយបំផុត។ ដូច្នេះហើយវាជារឿងត្រឹមត្រូវណាស់ ដែលយើងត្រូវចូលរួមជួយតាមលទ្ធភាពដែលអាចធ្វើទៅបាន ដើម្បីធានាថា សហគមន៍នេះ អាចទ្រាំទ្ររួចក្នុងកំឡុងពេលបិទខ្ទប់។​ យើងសង្ឃឹមថាការចូលរួមចំណែករបស់យើងនឹងគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការការពារសុខុមាលភាព និងការរស់នៅរបស់ប្រជាជនឱ្យឆាប់ត្រឡប់ទៅរកជីវភាពរស់នៅធម្មតាវិញតាមគន្លងថ្មី៕​អត្ថបទ៖ រដ្ឋា