ការប្រឹងប្រែងសងបំណុលដ៏ច្រើនបំផុត កំពុងលេចចេញជារូបរាងជាថ្មីម្តងទៀតហើយនៅសហរដ្ឋអាមេរិក ធ្វើឲ្យក្រុមអ្នកវិនិយោគទុន ចាប់ផ្តើមព្រួយបារម្ភដល់ទីផ្សារនៅក្នុងឆ្នាំនេះ ។

ក្រុមអ្នកវិភាគ និយាយថា ឱសានវាទរបស់រដ្ឋាភិបាលសហរដ្ឋអាមេរិក ដើម្បីដំឡើងប្រាក់បំណុល​ច្រើនបំផុត ៣១.៤សែនកោដិដុល្លារ អាចនឹងកើតឡើងឆាប់រហ័ស​ជាងការរំពឹងទុក នឹងនាំឲ្យ​មានហានិភ័យ​ដល់ការខកខានសងបំណុល ដែលអាចមានផលវិបាកធំនៅទូទាំង​ទីផ្សារហិរញ្ញវត្ថុ​សកលលោក ។

ការកើតមានឡើងវិញភាពទាល់ច្រកផ្នែកច្បាប់ជុំវិញការកំហិតបំណុលក្នុងទសវត្សរ៍ចុងក្រោយនេះ ត្រូវបានគេដោះស្រាយភាគច្រើន មុនពេលវាអាចជ្រៀតចូលទៅក្នុងទីផ្សារ ។ ទោះបីជាយ៉ាងណាក៏ដោយ ភាពទាល់ច្រកកាលពីឆ្នាំ ២០១១ បានបង្ខំឲ្យទីភ្នាក់ងារ Standard & Poor's បញ្ចុះអត្រាឥណទានសហរដ្ឋអាមេរិក ជាលើកដំបូង ធ្វើឲ្យទីផ្សារហិរញ្ញវត្ថុធ្លាក់ចុះ ។

ក្រុមអ្នកវិនិយោគទុនមួយចំនួន ព្រួយបារម្ភថា សំឡេងភាគច្រើនស្តួចស្តើងរបស់​គណបក្ស​សាធារណរដ្ឋនៅក្នុងសភា អាចនឹងធ្វើឲ្យមានការលំបាកក្នុងការឈានដល់ការ​សម្រុះសម្រួល​លើកនេះ ។

រដ្ឋមន្រ្តីក្រសួងរតនាគារសហរដ្ឋអាមេរិក លោក Janet Yellen បាននិយាយកាលពីខែមករា ដើមឆ្នាំ​២០២៣នេះថា រដ្ឋាភិបាលអាចសងប្រាក់បានរហូតត្រឹមខែមិថុនាប៉ុណ្ណោះ ដោយគ្មានការដំឡើងការកំហិតបំណុល ដែលរដ្ឋាភិបាលបានកំណត់កាលពីខែមករា ។

ក្រុមអ្នកវិភាគមួយចំនួន បានព្យាករណ៍ថា រដ្ឋាភិបាលអាមេរិក នឹងអស់ប្រាក់ និងសមត្ថភាពខ្ចីប្រាក់​នៅត្រីមាសទី ៣ ឬទី៤ ប៉ុន្តែបង្កាន់ដៃពន្ធខ្សោយជាងការរំពឹងទុកសម្រាប់ខែមេសា អាចនឹង​ពន្យាពេល​ឱសានវាទបាន ៕