ភ្នំពេញ៖ ប្រជាពលរដ្ឋប្រកបមុខរបរក្នុងវិស័យដឹកជញ្ជូន លើកឡើងស្រដៀងគ្នាថា រហូតមកដល់បច្ចុប្បន្ននេះ ទោះបីស្ថិតក្នុងវិបត្តិសាកលយ៉ាងណាក៏ដោយ ក្នុងនោះបានកត់សម្គាល់ឃើញថា រាជរដ្ឋាភិបាលកម្ពុជាបានគ្រប់គ្រងយ៉ាងល្អ ក្នុងការធានាឲ្យបរិមាណប្រេងប្រើប្រាស់គ្រប់គ្រាន់ និងមានតម្លៃសមរម្យអាចទទទួលយកបាន។

ជួបសម្ភាសន៍ផ្ទាល់រវាងទូរទស្សន៍ព័ត៌មាន ប៊ីធីវី នៅព្រឹកថ្ងៃទី២១ មេសា ឆ្នាំ២០២៣នេះ ស្ថិតនៅតំបន់បេនឡានផ្សារធំថ្មី រាជធានីភ្នំពេញ ពលរដ្ឋ សុខ ជា ប្រកបរបរដឹកជញ្ជូនត្រី និងគ្រឿងសមុទ្រ ពីខេត្តកំពត និងក្រុងភ្នំពេញ បានឲ្យដឹងថា លោកមានការសប្បាយចិត្តណាស់​ដែលរដ្ឋាភិបាលទប់ស្កាត់បានល្អក្នុងការកំណត់ថ្លៃលក់រាយប្រេងឥន្ធនៈនៅតាមស្ថានីយ ដែលផ្តល់ភាពងាយស្រួលក្នុងការធ្វើអាជីវកម្ម ។

មិនខុសគ្នាខាងលើនេះ លោក ជុំ ប៊ុណ្ណា ម្ចាស់រថយន្តឈ្នួលរវាងភ្នំពេញ ខេត្តកំពង់ចាម និងលោក ចាន់ សាមុត អ្នករត់ម៉ូតូឌុប នៅរាជធានីភ្នំពេញ បានលើកឡើងថា ជុំវិញបញ្ហាតម្លៃប្រេងនៅកម្ពុជា ក្នុងពេលកន្លងមក ពួកគាត់ធ្លាប់មានការព្រួយបារម្ភខ្លះដែរ អំពីការខ្វះខាតប្រេង ដោយសារកម្ពុជា មិនមែនជាប្រទេសផលិតប្រេងបាន ​និងម្យ៉ាងវិញទៀត ដោយសារតែការប្រើប្រាស់​ក៏មានច្រើនជាង​មុន ។ ប៉ុន្តែ រហូតមកដល់ពេលនេះ ពួកគាត់មិនមានការបារម្ភទៀតនោះទេ ដោយសារការដឹកនាំ​ដ៏ល្អរបស់រាជរដ្ឋាភិបាលកម្ពុជា​នាពេលបច្ចុប្បន្ន។

ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានបញ្ជាក់ថា ទោះបីជាតម្រូវការប្រើប្រាស់ប្រេងឥន្ធនៈកើនឡើងច្រើនយ៉ាងណាក្តី ​ក៏កម្ពុជាមិនប្រឈមខ្វះខាតដែរ ដោយសារតែកិច្ចសហការដ៏ល្អ រវាងក្រសួងពាណិជ្ជកម្ម និងក្រុមហ៊ុនឯកជនដែលនាំចូលប្រេង សុទ្ធតែ​បានរួមសហការគ្នាទៅវិញទៅមក ធ្វើយ៉ាងណាធានាឲ្យបរិមាណប្រេងគ្រប់គ្រាន់សម្រាប់លក់ និងតម្លៃសមរម្យអាចទទទួលយកបានទាំងសងខាង រវាងអ្នកលក់ និងទិញយកទៅប្រើប្រាស់។

ជុំវិញបញ្ហាខាងលើនេះ កាលពីព្រឹកថ្ងៃទី២០ ខែមេសាម្សិលមិញនេះ នៅក្នុងពិធីសម្ពោធដាក់​ឲ្យប្រើប្រាស់​ជាផ្លូវការអគារសម្ភព នៃមន្ទីរពេទ្យកុមារជាតិ​ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ​បានថ្លែងថា កម្ពុជា ​មិនមែនជាប្រទេសផលិតប្រេងនោះទេ ប៉ុន្តែរដ្ឋ នឹងបន្តជួយគ្រប់គ្រង​ កុំឱ្យមានការដំឡើងថ្លៃប្រេងសាំងតាមចិត្តរបស់ក្រុមហ៊ុននាំចូល​៕អត្ថបទ៖ ឈិត បូរ៉ាវី