​

​តុលាការ​កំពូល​សហរ​ដ្ឋ​អាមេរិក កាលពី​ថ្ងៃ​សុក្រ​បាន​រារាំង​វិធានការ​រឹតត្បិត​ថ្មី​ដែល​កំណត់ដោយ​តុលាការ​ជាន់​ទាប លើ​ឱសថ​រំលូតកូន​ដែល​ត្រូវបាន​ប្រើប្រាស់​យ៉ាង​ទូលំទូលាយ​ដោយ​ផ្តល់​ភាពជោគជ័យ​ដល់​រដ្ឋបាល​របស់​ប្រធានាធិបតី លោក Joe Biden ខណៈ​រដ្ឋបាល​នេះ បាន​ការពារ​សិទ្ធិ​ប្រើប្រាស់​ឱសថ​យ៉ាង​ទូលំទូលាយ នៅក្នុង​ការការពារ​ផ្លូវច្បាប់​ដ៏​ខ្លាំងក្លា​ចុងក្រោយ​លើ​សិទ្ធិ​បន្ត​ពូជ​នៅ​សហរដ្ឋអាមេរិក​។

នៅក្នុង​បទបញ្ជា​ខ្លី​មួយ ក្រុម​ចៅក្រម​តុលាការ​កំពូល​ត្រូវ​បានផ្តល់​ការអនុញ្ញាត​ដល​សំណើសុំ​បន្ទាន់ដោយ​ក្រសួងយុត្តិធម៌ និង​ក្រុមហ៊ុន​ផលិត​ថ្នាំ​គ្រាប់ Danco Laboratories ដើម្បី​ផ្អាក​សេចក្តី​បង្គាប់​បឋម​កាលពី​ថ្ងៃទី៧ ខែមេសា ដែល​ចេញ​ដោយ​ចៅក្រម​សហព័ន្ធ​ប្រចាំ​តំបន់​របស់​សហរដ្ឋអាមេរិក លោក Matthew Kacsmaryk ក្នុង​រដ្ឋ​តិច​សាស់​។ សេចក្តី​បង្គាប់​របស់​ចៅក្រម​បានកំណត់​យ៉ាងខ្លាំង​ចំពោះ​លទ្ធភាព​នៃ​ការប្រើប្រាស់​ឱសថ មី​ហ្វេ​ប្រ៊ី​ស្តូ​ន​(mifepristone) ខណៈ​វិវាទ​ដំណើរការ​ក្នុង​បញ្ហា​ប្រឈម​ដោយ​ក្រុមប្រឆាំង​ការ​រំលូតកូន​ចំពោះ​ការអនុម័ត​បទ​ប្បញ្ញត្តិ​សហព័ន្ធ​របស់ខ្លួន​។

លោក Biden បាន​និយាយ​នៅក្នុង​សេចក្តីថ្លែងការណ៍​ដែល​ចេញ​ដោយ​សេត​វិមាន​ថា ជា​លទ្ធផល​នៃ​ការបន្ត​របស់​តុលាការ​កំពូល ឱសថ mifepristone នៅតែ​រក្សា​ការប្រើប្រាស់​បាន និង​ត្រូវ​បានអនុម័ត​សម្រាប់​ការប្រើប្រាស់​ដោយ​សុវត្ថិភាព និង​មាន​ប្រសិទ្ធភាព ខណៈ​យើង​បន្ត​ការតស៊ូ​មតិ​នេះ​នៅក្នុង​តុលាការ​។ លោក​Biden និយាយថា ហានិភ័យ​មិនអាច​ខ្ពស់ជាង​នេះ​នោះទេ​សម្រាប់​ស្ត្រី​នៅ​ទូទាំង​សហរដ្ឋអាមេរិក​។

លោក​នឹង​បន្ត​ប្រយុទ្ធប្រឆាំង​ការវាយប្រហារ​ដែល​ជំរុញ​ដោយ​នយោបាយ​លើ​សុខភាព​ស្ត្រី​។ រដ្ឋបាល​ចំណីអាហារ និង​ឱសថ (FDA) ជាទី​ភ្នាក់ងារ​របស់​ស​ហ​រដ្ឋ​អាមេរិក ដែល​បាន​ចុះហត្ថលេខា លើ​សុវត្ថិភាព​នៃ​ផលិតផល​ចំណីអាហារ ឱសថ និង​ឧបករណ៍​វេជ្ជសាស្ត្រ បានអនុម័ត​ឱសថ mifepristone កាលពី​ឆ្នាំ២០០០​។ ករណី​បច្ចុប្បន្ន​អាច​កាត់បន្ថយ​សិទ្ធិ​គ្រប់គ្រង​សហព័ន្ធ​លើ​សុវត្ថិភាព​ឱសថ​។

រដ្ឋបាល​របស់លោក Biden កំពុង​ព្យាយាម​ការការពារ​ឱសថ mifepristone ក្នុង​ប្រឈមមុខ​នឹង​បម្រាម​ការ​រំលូតកូន និង​វិធានការ​រឹតត្បិត​ដែល​អនុម័ត​ដោយ​រដ្ឋ ដឹកនាំ​ដោយ​គណបក្ស​សាធារណរដ្ឋ ចាប់តាំងពី​តុលាការ​កំពូល​កាលពី​ខែមិថុនា ឆ្នាំ២០២២ បាន​ទាត់ចោល​សេចក្តី​ការសម្រេច Roe v. Wade ឆ្នាំ១៩៧៣ ដែល​បានផ្តល់​ភាពស្របច្បាប់​ដល់​នីតិ​អនុវត្តន៍​នៅ​ទូទាំងប្រទេស​។​