​

​អគ្គលេខាធិការ​អង្គការ​សន្ធិសញ្ញា​អា​ត្ល​ង់​ទិ​ក​ខាងជើង​(NATO) លោក Jens Stoltenberg បាន​និយាយ​កាលពី​ថ្ងៃ​សុក្រ​ថា សម្ព័ន្ធមិត្ត​ទាំង​អស់នៃ​សម្ព័ន្ធ​យោធា​ណា​តូ បាន​ព្រមព្រៀង​ថា​នៅ​ទីបំផុត ប្រទេស​អ៊ុយ​ក្រែ​ន នឹង​ក្លាយជា​រដ្ឋ​សមាជិក ប៉ុន្តែ​ការផ្តោត​សំខាន់​នាពេល​បច្ចុប្បន្ននេះ គឺ​ត្រូវ​ធានា​ឲ្យ​បាន​ថា ប្រទេស​នេះ​មាន​ជ័យជំនះ​លើ រុស្ស៊ី​។​

​លោក Stoltenberg បាន​ថ្លែង​ទៅកាន់​អ្នកសារព័ត៌មាន មុន​ជំនួប​ជាមួយ​ក្រុម​ទំនាក់ទំនង​ការពារ​អ៊ុយ​ក្រែ​ន នៅ​មូ​ដ្ឋា​ន​ទ័ពអាកាស រ៉េ​ម​ស្តា​ញ (Ramstein) ក្នុងប្រទេស​អាល្លឺម៉ង់​។ លោក​បាន​និយាយថា ទីក្រុង គី​វ ត្រូវតែមាន​របាំង​ការពារ​ដើម្បី​ទប់​ការវាយលុក​ថ្មីៗ​នៅពេលដែល​ជម្លោះ​បញ្ចប់​។​

​រុស្ស៊ី​និយាយ​កាលពី​ថ្ងៃ​ព្រហស្បតិ៍​ថា ការរារាំង​អ៊ុយ​ក្រែ​ន មិន​ឲ្យ​ចូលរួម​ជាមួយ​សម្ព័ន្ធមិត្ត​ឆ្លងកាត់​មហា សមុទ្រ​អា​ត្ល​ង់​ទិ​ក នៅតែ​ជា​គោលដៅ​មួយ​ក្នុងចំណោម​គោលដៅ​ចម្បង​នៃ​ប្រតិបត្តិការ​សឹក​ពិសេស​របស់ខ្លួន​។ អ្នកនាំពាក្យ​វិមាន​ក្រឹម​ឡាំង លោក Dmitry Peskov និយាយថា បើ​មិន​ដូច្នេះ​ទេ សន្តិសុខ​នៃ​ប្រទេស​របស់​យើង​នឹងរង​ការ​គំរាម​ដ៏​ធំ​និង​ធ្ងន់ធ្ងរ​៕​