ពោធិ៍សាត់៖ ឯកឧត្តម ចាន់ សុដាវ៉ាត់ អនុប្រធានក្រុមការងារគណបក្សប្រជាជនកម្ពុជាស្រុកបាកាន ទទួលបន្ទុកឃុំមេទឹក រួមនិងក្រុមការងារនាថ្ងៃទី២២ ខែមេសា ឆ្នាំ២០២៣ បាននិមន្តព្រះសង្ឃធ្វើពិធីប្រោះព្រំសុគន្ធវារី ជូនដល់លោកតា លោកយាយ ក្នុងឃុំមេទឹក ដែលមានអាយុចាប់ពី ៧៥ឆ្នាំឡើង ដើម្បីចម្រើនជន្មាយុ និងជាការដឹងគុណចំពោះ​មនុស្សចាស់។ ពិធីនេះបានប្រារព្ធធ្វើនៅទីអារាមវត្តក្ដាត ស្ថិតក្នុងឃុំមេទឹក ស្រុកបាកាន ខេត្តពោធិ៍សាត់។

ឯកឧត្តម ចាន់ សុដាវ៉ាត់ បានលើកឡើងថា ក្រុមការងារចុះមកឃុំមេទឹកនេះ គឺជាកូន ជាចៅ ជាបង ជាប្អូន ដើម្បី​បម្រើលោកតា លោកយាយ និង​ប្រជាពលរដ្ឋ។ ពីមួយអាណត្តិទៅមួយអាណត្តិ រាជរដ្ឋាភិបាលដឹកនាំដោយ​គណបក្សប្រជាជនកម្ពុជា បានកសាងសមិទ្ធផលច្រើនរាប់មិនអស់ ដែលបម្រើសេចក្ដីត្រូវការរបស់ពលរដ្ឋទូទាំងប្រទេស។ ដូចនេះការបោះឆ្នោតគ្រាំទ្រ គណបក្សប្រជាជនកម្ពុជា នៅថ្ងៃទី២៣ ខែកក្កដា ឆ្នាំ២០២៣ ជ្រើសរើស​តំណាងរាស្ត្រ អាណត្តិទី៧ខាងមុខនេះ គឺដើម្បីទទួលបានសុខសន្តិភាព ទទួលបានការអភិវឌ្ឍន៍  និងការគាំពារ​សង្គមរយៈពេល៥ឆ្នាំបន្តទៀត ជូនលោកយាយ លោកតា និងប្រទេសជាតិយើងទាំងមូល។

ក្នុងឱកាសនោះ ក្រុមការងារបានរៀបចំអាហារសាមគ្គីជូនលោកតាលោកយាយ និងបានសុខទុក្ខគ្នាទៅវិញទៅមក រំលឹកនូវអនុស្សាវរីយ៍ និងសាមគ្គីភាពវ័យចំណាស់ជាធ្លុងមួយផងដែរ។

បន្ទាប់មកឯកឧត្តម ចាន់ សុដាវ៉ាត់ បានអញ្ជើញទៅពិនិត្យមើលការជីកស្រះ និងចាក់ដីពង្រីកទីធ្លាវត្តក្ដាត បន្ថែមលើនោះឯកឧត្តម និងក្រុមការងារនឹងចូលរួមថវិកាកសាងរបងវត្ត តាមការបិណ្ឌបាតរបស់ព្រះចៅអធិការ និងការស្នើរបស់គណៈកម្មការវត្តផងដែរ ៕ ដោយ៖ ពៅ ភិរុណ