ក្រុមជនបរទេស ត្រូវបានជម្លៀសចេញពីប្រទេសស៊ូដង់ ស្របពេលដែលសង្រ្គាមរវាងកងកម្លាំងប្រដាប់អាវុធគូប្រជែងទាំង ២ នៅតែបន្តនៅក្នុងរដ្ឋធានី Khartoum ។
មនុស្សជាង ១៥០នាក់ ត្រូវបានជម្លៀសចេញតាមសមុទ្រទៅកាន់កំពង់ផែអារ៉ាប៊ីសាអូឌីត កាលពីថ្ងៃសៅរ៍ ដែលភាគច្រើននៃពួកគេគឺជាពលរដ្ឋរស់នៅតាមបណ្តាប្រទេសឈូងសមុទ្រអារ៉ាប់ ។
អាកាសយានដ្ឋានទីក្រុង Khartoum បានក្លាយជាគោលដៅវាយប្រហារឥតឈប់ឈរ ហើយរដ្ឋាភិបាលកាណាដា និយាយថា ពុំទាន់មានជើងហោះហើរនៅឡើយទេ ។ ពួកគេបាននិយាយប្រាប់ប្រជាពលរដ្ឋកាណាដានៅក្នុងប្រទេសស៊ូដង់ ឲ្យរកទីជម្រកសុវត្ថិភាព ។
ខណៈពេលនោះដែរ ចក្រភពអង់គ្លេស បាននិយាយថា ពួកគេកំពុងគិតរកផ្លូវដើម្បីជម្លៀសបុគ្គលិករបស់ខ្លួនចេញ ពីប្រទេសស៊ូដង់ ។ ការភ្ជាប់ទំនាក់ទំនងតាមទូរស័ព្ទ ត្រូវបានបង្កើតឡើងសម្រាប់អ្នកដែលត្រូវការជំនួយបន្ទាន់ ហើយពលរដ្ឋអង់គ្លេស នៅក្នុងប្រទេសស៊ូដង់ ត្រូវបានជំរុញឲ្យនិយាយប្រាប់ការិយាល័យក្រសួងការបរទេស តាមអនឡាញ ឬតាមទូរស័ព្ទបញ្ជាក់ប្រាប់ពីកន្លែងដែលពួកគេស្ថិតនៅ ។
ការជម្លៀសខ្លួនពលរដ្ឋអង់គ្លេស ត្រូវបានគេរំពឹងថាមានការកំណត់ ហើយការផ្តោតសំខាន់ដំបូង លើបុគ្គលិកការទូត ពោលគឺមិនដូចជាការជម្លៀសខ្លួនទ្រង់ទ្រាយធំចេញពីប្រទេសអាហ្វហ្គានីស្ថាន កាលពីឆ្នាំ ២០២១នោះទេ ៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
