ក្រុមមន្ត្រីក្នុងតំបន់បាននិយាយថា យ៉ាងហោចណាស់មានមីស៊ីលរបស់រុស្ស៊ីចំនួន៥ គ្រាប់ ត្រូវបានវាយប្រហារលើទីក្រុង Kharkiv ភាគខាងកើតអ៊ុយក្រែន និងសង្កាត់​ជុំវិញ​កាល​ពី​ល្ងាច​ថ្ងៃ​សៅរ៍ (២២ មេសា) ដែលបណ្តាលឱ្យខូចខាតអគាររបស់ជនស៊ីវិលមួយចំនួន។

អភិបាល​តំបន់លោក Oleh Syniehubov បានសរសេរនៅលើសារតេឡេក្រាមថា មីស៊ីល​មួយ​គ្រាប់ បានវាយប្រហារលើលំនៅស្ថានមួយខ្នងនៅក្នុងភូមិ Kotliary ស្ថិតនៅ​ភាគ​ខាង​ត្បូង​ នៃ​ទី​ក្រុង Kharkiv ខណៈមួយគ្រាប់ទៀត បានបង្កឱ្យមានអគ្គីភ័យដ៏ធំនៅក្នុងទីក្រុងនោះ។

លំនៅ​ឋាន​​ចំនួន ២ខ្នង បានរងការខូចខាតធ្ងន់ធ្ងរ ដោយការវាយប្រហារនៅភូមិ Kotliary ដែលក្នុងនោះ មួយខ្នងត្រូវបំផ្លិចបំផ្លាញដោយការបំផ្ទុះ ដែល​បណ្តាល​ឲ្យ​ខូច​ខាត​លំនៅឋាន​មួយ​ខ្នង​ទៀត​នៅ​ក្បែរនោះ។

អ្នកស្រី Liubov Holoshchapova អ្នកស្រុកម្នាក់ បានប្រាប់សារព័ត៌មានរ៉យទ័រថា “បង្អួចទាំង​អស់​ត្រូវ​ខូច​ខ្ទេច​ខ្ទី៖ ដោយបង្អួចពីរនៅខាងនេះ និងបង្អួចពីរទៀត នៅផ្នែកម្ខាងទៀត ចំណែក​ឯ​ដំបូល ត្រូវរងការបំផ្លាញដោយអន្លើ“៕ អត្ថបទ៖ វ៉ាន់ ស្រីទាវ