ភ្នំពេញ៖ គ្រឹះស្ថានអប់រំ និងសាកលវិទ្យាល័យចំនួន២០កន្លែង នៅតាមបណ្ដាខេត្ត ក្រុងមួយ ចំនួន នៃប្រទេសចិន ប្រកាសផ្ដល់អាហារូបករណ៍ដោយគ្មានកំណត់ ដល់សិស្សនិស្សិតកម្ពុជា បានទៅសិក្សាបន្តនៅប្រទេសចិន តាមរយៈការសម្របសម្រួលពីសមាគមនិស្សិតសាកលវិទ្យាល័យរាជធានីភ្នំពេញ និងបណ្ដាខេត្ត (PPSA) ។

ក្នុងពិព័រណ៍អាហារូបករណ៍ និងការសិក្សា នៅថ្ងៃទី២៣ ខែមេសា ឆ្នាំ២០២៣ នាសាលាគ្រូយើង សាខារាជ ធានី ភ្នំពេញ រៀបចំដោយសមាគមនិស្សិតសាកលវិទ្យាល័យរាជធានីភ្នំពេញ និងបណ្ដាខេត្ត លោកស្រី សំរឹទ្ធ ធីតា អនុប្រធាន PPSA លើកឡើងថា សម្រាប់អាហារូបករណ៍ផ្ដលជូនដល់សិស្សនិស្សិតកម្ពុជានេះ គឺចាប់ពីថ្ងៃទី៩ (ឌីប្លូម) រហូតដល់ថ្នាក់បណ្ឌិត សិក្សាលើជំនាញប្រមាណជា៤០ មានដូចជា ជំនាញ ស្ថាបត្យកម្ម (Architecture), វេជ្ជសាស្ត្រ និងវិទ្យាសាស្ត្រជាដើម ។

លោកស្រី បន្តថា ឪពុកម្ដាយ ឬសិស្សនិស្សិត ដែលចង់បានអាហារូបករណ៍ទៅសិក្សានៅប្រទេសចិននេះ អាចទាក់ទងតាមរយៈ PPSA ដោយពលរដ្ឋទាំងអស់មានឱកាសទទួលបានដូចគ្នា ។ សម្រាប់លក្ខខ័ណ្ឌ ដើម្បីទទួលបានអាហារូបករណ៍ គឺជាសិស្សឆ្នើម ចេះភាសាចិន (Level HSK 4) ហើយចំពោះសិស្សនិស្សិត ដែលមានឆន្ទៈចង់ទៅសិក្សា ទោះមិនភាសាចិន ក៏អាចទៅបានដែរ។

ក្នុងពេលទៅទស្សនាពិព័រណ៍អាហារូបករណ៍ និងការសិក្សា សិស្សានុសិស្ស លើកឡើងថា ពិព័រណ៍នេះ​ពិតជាល្អ​ណាស់​សម្រាប់សិស្សនិស្សិតនៅកម្ពុជា ដែលមានបំណងប្រាថ្នាទៅសិក្សានៅក្រៅប្រទេស ខណៈពួកគេក៏​ចង់ទៅ​សិក្សានៅប្រទេសចិនផងដែរ ព្រោះជាប្រទេសក្នុងតំបន់អាស៊ីមួយ ដែលមានភាពរីកចម្រើនខ្លាំង និងអាចដក​ស្រង​នូវចំណេះដឹង និងបទពិសោធន៍ ។

ក្នុងឱកាសអញ្ជើញចូលរួមក្នុងពិព័រណ៍នោះ ឯកឧត្តមបណ្ឌិត ស្រេង វង្សហៀង អនុរដ្ឋលេខាធិការក្រសួងមហាផ្ទៃ មាន​ប្រសាសន៍ថា ការផ្ដល់អាហារូករណ៍ជាបន្តបន្ទាប់ដល់សិស្សនិស្សិតកម្ពុជា ពីសំណាក់ប្រទេសចិន គឺបានបង្ហាញ​កាន់តែច្បាស់ ក្នុងការជួយអភិវឌ្ឍន៍ និងពង្រឹងវិស័យអប់រំនៅកម្ពុជា ដែលក្នុងនាមជាមិត្តដែកថែប និង​កិច្ចសហប្រតិបត្តិការ​គ្រប់ជ្រុងជ្រោយ ។

ជាមួយនេះ ឯកឧត្តមបានជំរុញដល់សិស្សនិស្សិត ដែលបានជាប់អាហារូបករណ៍ បានទៅសិក្សានៅប្រទេសចិន សូមខិតខំរៀនសូត្រ ដើម្បីយកចំណេះដឹងចំណេះជំនាញ មកចូលរួមអភិវឌ្ឍន៍ប្រទេស​ជាតិឲ្យកាន់តែ​មាន​ភាពរីកចម្រើន ៕ អត្ថបទ៖ បាន សុខរិទ្ធ