អ៊ីស្រាអែល ៖ ក្រុមនគរបាលអ៊ីស្រាអែល និយាយថា មនុស្ស ៥នាក់ បានរងរបួស ក្នុងហេតុការណ៍​វាយប្រហារ​បើករថយន្តបំបុក ដោយជនប៉ាឡេស្ទីន នៅកណ្តាលទីក្រុងហ៊្សេរុយសាឡឹម ។ រថយន្តមួយគ្រឿងនេះ បានបើកបុក​អ្នកថ្មើរជើង​នៅ​ជិតផ្សារដ៏មមាញឹក Machane Yehuda ។ 

ជនវាយប្រហារត្រូវបានបាញ់សម្លាប់នៅកន្លែងកើតហេតុដោយជនស៊ីវិល ។ ក្រុមនគរបាលនិយាយថា ជន​វាយ​ប្រហារ​​​គឺជាបុរសវ័យ ៣៩ឆ្នាំម្នាក់ មកពីតំបន់កាន់កាប់ហ៊្សេរុយសាឡឹមខាងកើត ។ 

ការវាយប្រហារមួយនេះ បានកើតមាន ស្របពេលដែលអ៊ីស្រាអែលចាប់ផ្តើមប្រារព្ធទិវាខួប​អស្សាវរីយ៍សម្រាប់​ទាហានពលី ​និងជនរងគ្រោះនៃការវាយប្រហារ និងស្ថិតក្នុងចំណោមថ្ងៃ​ដ៏ឧឡារិកបំផុត​នៅក្នុងប្រតិទិន​បុណ្យជាតិ​អ៊ីស្រាអែល ។ 

ថ្លែងនៅក្នុងពិធីប្រារព្ធខួបអនុស្សាវរីយ៍ នាយករដ្ឋមន្រ្តីអ៊ីស្រាអែល លោក Benjamin Netanyahu និយាយថា ការវាយ​ប្រហារបែបនេះ គឺជាការព្យាយាមមួយទៀតដើម្បីធ្វើឃាតពលរដ្ឋអ៊ីស្រាអែល ។ 

លោកបន្តថា ការវាយប្រហាររបស់ភេរវករទាំងនេះ ធ្វើឡើងដោយមានការរំពឹងថា ពួកគេនឹងអាចយកឈ្នះពួក​យើង​បាន ថាពួកគេនឹងអាចគាស់រំលើងពួកយើងពីទីនេះបាន ហើយបើសិនជាពួកគេអាច ពួកគេនឹងធ្វើឃាតពួក​យើង​ទាំងអស់គ្នា ​ប៉ុន្តែពួកគេ មិនអាចយកឈ្នះពួកយើងបានទេ មានតែពួកយើងទេដែលនឹងយកឈ្នះពួកគេបាន ៕ ដោយ ៖ សារ៉ាត់