ភ្នំពេញ៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ឯកឧត្តម អាន សុខខឿន បានឲ្យនារសៀលថ្ងៃទី២៥ ខែមេសា ឆ្នាំ២០២៣នេះថា ចំពោះស្ថានភាពនិស្សិតខ្មែរនៅប្រទេសស៊ូដង់ ត្រូវបានសម្របសម្រួលរៀបចំឲ្យនៅកន្លែងមានសុវត្ថិភាព។
ទាក់ទងនឹងស្ថានភាពនិស្សិតខ្មែរ នៅក្នុងប្រទេសស៊ូដង់ អ្នកនាំពាក្យក្រសួងការបរទេស បានឲ្យដឹងថា នៅប្រទេសស៊ូដង់ មាននិស្សិតខ្មែរចំនួន០៦នាក់ (ស្រី០២នាក់) ចេញទៅសិក្សា នៅក្នុងសាកលវិទ្យាល័យមួយ នៅក្នុងទីក្រុងខាតូម។
អ្នកនាំពាក្យរូបនេះ បញ្ជាក់ថា «បន្ទាប់ពីការផ្ទុះឡើងនូវការប្រយុទ្ធបង្ហូរឈាម នៅក្នុងទីក្រុងខាតូម កាលពីថ្ងៃទី១៥ ខែមេសា ឆ្នាំ២០២៣ សាកលវិទ្យាល័យខាងលើបានប្រមូលផ្តុំនិស្សិតទាំងអស់ (ចម្រុះជាតិសាសន៍) ឱ្យមកស្នាក់នៅក្នុងទីតាំងមួយ ក្នុងសាកលវិទ្យាល័យ»។
អ្នកនាំពាក្យរូបនេះ បញ្ជាក់ទៀតថា «តាមការសម្របសម្រួលជាមួយស្ថានទូតម៉ាឡេស៊ី និងទំនាក់ទំនងជាប្រចាំរបស់ស្ថានឯកអគ្គរាជទូតកម្ពុជា ប្រចាំនៅទីក្រុងគែរ ប្រទេសអេហ្ស៊ីប និស្សិតខ្មែរខាងលើ បច្ចុប្បន្ននេះ កំពុងស្ថិតក្នុងទីតាំងមានសុវត្ថិភាព និងស្នាក់នៅជាមួយនិស្សិតម៉ាឡេស៊ី ដើម្បីរង់ចាំការជម្លៀសទាំងអស់គ្នាចេញពីប្រទេសសូដង់ ក្នុងពេលឆាប់ៗនេះ»។
អ្នកនាំពាក្យរូបនេះ បន្ថែមថា គិតត្រឹមយប់ថ្ងៃទី២៤ ខែមេសា ឆ្នាំ២០២៣ ភាគីម៉ាឡេស៊ី បាននឹងកំពុងសម្របសម្រួលជាមួយភាគីពាក់ព័ន្ធ ដើម្បីសម្រេចលើមធ្យោបាយធ្វើដំណើរចាកចេញពីប្រទេសសូដង់ឱ្យបានឆាប់តាមតែអាចធ្វើទៅបាន។
សម្តេចតេជោ ហ៊ុន សែន នាយករដ្ឋមន្ត្រី កាលពីម្សិលមិញនេះ បានបញ្ជាឲ្យមន្ត្រីជាន់ខ្ពស់កម្ពុជា សហការរៀបចំជម្លៀសនិស្សិតខ្មែរនៅប្រទេសស៊ូដង់ ដោយរៀបចំជម្លៀសពួកគាត់ធ្វើតាមមធ្យោបាយរួមជាមួយប្រជាជនម៉ាឡេស៊ី ដែលគ្រោងជម្លៀសចេញពីប្រទេសស៊ូដង់មិនថាតាមយន្តហោះ ឬនាវាក្តី៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
