ភ្នំពេញ៖ ថ្ងៃនេះមានអ្នកសារព័ត៌មាននានានៅតំបន់ទន្លេមេគង្គ ចូលរួមវគ្គបណ្តុះបណ្តាលសារព័ត៌មានតំបន់ទន្លេមេគង្គលើកទី២ ក្រោមប្រធានបទ «ការចូលរួមរបស់ប្រព័ន្ធផ្សព្វផ្សាយ ដើម្បីតំបន់ទន្លេមេគង្គសន្តិភាព ស្ថិរភាព និងវិបុលភាព»។

នៅថ្ងៃទី២៦ ខែមេសា ឆ្នាំ២០២៣ មានអ្នកសារព័ត៌មានជិត៥០នាក់ មកពីកម្ពុជា ឡាវ មីយ៉ាន់ម៉ា ថៃ ចិន និងវៀតណាម បានចូលរួមវគ្គបណ្តុះបណ្តាលសារព័ត៌មានតំបន់ទន្លេមេគង្គ លើកទី២ ក្រោមប្រធានបទ «ការចូលរួមរបស់ប្រព័ន្ធផ្សព្វផ្សាយ ដើម្បីតំបន់ទន្លេមេគង្គសន្តិភាព ស្ថិរភាព និងវិបុលភាព» ក្រោមអធិបតីភាពឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងវាគ្មិនអ្នកជំនាញជាតិ និងអន្តរជាតិជាច្រើនរូប។

ឯកឧត្តមបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា មានប្រសាសន៍ថា អ្នកសារព័ត៌មានពិតជាមានតួនាទីសំខាន់ណាស់ក្នុងនាំមកនូវ ព័ត៌មានពិត​អំពីតំបន់មេគង្គ និងរួមចំណែកមិនអាចខ្វះបានក្នុងការធ្វើឱ្យតំបន់មេគង្គមាន សន្តិភាព ស្ថិរភាព និងវិបុលភាព។

ឯកឧត្តម បញ្ជាក់ថា ក្នុងបរិបទនេះហើយ ទើបវិទ្យាសា្ថនទំនាក់ទំនងអន្តរជាតិនៃរាជបណ្ឌិត្យសភាកម្ពុជា និងក្លិបអ្នកកាសែតកម្ពុជា សហការគ្នារៀបចំសិក្ខាសាលាបណ្តុះបណ្តាលសារ ព័ត៌មានលើកទី២ ស្តីពី «ការចូលរួមរបស់​ប្រព័ន្ធផ្សព្វផ្សាយដើម្បីតំបន់មេគង្គសន្តិភាព ស្ថិរភាព និងវិបុលភាព» នេះឡើង ក្នុងគោលបំណង លើកកម្ពស់ការយល់ដឹងនិងស្វែងយល់អំពីប្រព័ន្ធនយោបាយនិងប្រព័ន្ធបោះ ឆ្នោត ដំណើរការ​ប្រជាធិបតេយ្យ និងការរៀបចំការបោះឆ្នោតានៅប្រទេសក្នុង តំបន់មេគង្គ, ពិនិត្យមើលទិដ្ឋភាពបរិស្ថាន សេដ្ឋកិច្ចសង្គម និងការអភិវឌ្ឍនៃប្រទេសមេគង្គ ក៏ដូចជាពិនិត្យមើលក្របខណ្ឌកិច្ចសហប្រតិបត្តិការនានានៅតំបន់មេគង្គ រួមទាំងរបៀប វារៈនយោបាយ និងប្រតិបត្តិការសំខាន់ៗ។

ឯកឧត្តម លើកឡើងថា វគ្គបណ្តុះបណ្តាលនេះនឹងលើកកម្ពស់ការទំនាក់ទំនង និងការអនុវត្តប្រព័ន្ធ​ផ្សព្វផ្សាយកាន់តែប្រសើរឡើង អំពីប្រព័ន្ធនយោបាយ និងការបោះឆ្នោតនៅក្នុងតំបន់មេគង្គ។ ទន្លេមេគង្គ គឺជាទន្លេដែលវែងជាងគេនៅអាស៊ីអាគ្នេយ៍។ ទន្លេមេគង្គ មានប្រវែងប្រហែល ៤,៩០០គីឡូម៉ែត្រ ដែលហូរចេញពីប្រភពរបស់វានៅលើខ្ពង់រាបទីបេ ក្នុងប្រទេសចិន កាត់តាម​ប្រទេសមីយ៉ាន់ម៉ា ឡាវ ថៃ កម្ពុជា និងវៀតណាម។

តំបន់ដែលទន្លេនេះហូរកាត់ត្រូវបានគេហៅថា មហាអនុតំបន់ទន្លេមេគង្គ (GMS) ឬជាមហាអនុតំបន់​ទន្លេមេគង្គ ដែលលាតសន្ធឹងលើប្រទេសចំនួន៦ ដូចជា ចិន មីយ៉ាន់ម៉ា ឡាវ ថៃ កម្ពុជា និងវៀតណាម។ ទន្លេមេគង្គជាតំបន់អន្តរប្រទេសនៃអាងទន្លេមេគង្គ ដែលមានប្រជាជនជាង ៣០០លាននាក់។

មហាទន្លេមេគង្គ មានធនធានធម្មជាតិ និងវប្បធម៌ដែលមិនអាចជំនួសបាន ហើយត្រូវបានចាត់ទុកថា ជាតំបន់សម្បូរជីវចម្រុះដ៏សំខាន់បំផុតមួយរបស់ពិភពលោក ខណៈទន្លេមេគង្គ ក៏ជាកន្លែងផ្គត់ផ្គង់អាហារដ៏សំខាន់ផងដែរ៕