ក្នុងរយៈពេល៣សប្តាហ៍ខាងមុខ រហូតដល់ការបោះឆ្នោតសកលក្នុងប្រទេសនៅថ្ងៃទី១៤ ខែឧសភា ក្រុមគណបក្សប្រឆាំងរបស់ប្រទេសនេះ នៅតែរក្សាការនាំមុខក្នុងការស្ទង់មតិ​ចំនួន២នៅទូទាំងប្រទេស ដែលត្រូវបានចេញផ្សាយនៅសប្តាហ៍នេះ។អាសនៈសរុប៥០០អាសនៈនៅក្នុងសភាជាន់ទាប ត្រូវដាក់ឲ្យប្រជែងដណ្តើមគ្នានៅក្នុងការ​បោះឆ្នោត​នៅពេលខាងមុខ។

កាលពីដើមខែនេះ គណបក្សនយោបាយជាច្រើន បានចុះឈ្មោះបេក្ខជនរបស់ពួកគេសម្រាប់សភា និងបានប្រកាសអ្នកត្រូវតែងតាំងសម្រាប់តំណែងនាយករដ្ឋមន្ត្រី។ ប្រជាជនថៃជាង៥២លាននាក់ មានអាយុ១៨ឆ្នាំឡើងទៅមានសិទ្ធបោះឆ្នោត។

យោងតាមការស្ទង់មតិធ្វើឡើងនៅខែនេះ ដោយវិទ្យាស្ថានជាតិ នៃរដ្ឋបាលអភិវឌ្ឍន៍ (NIDA) និងសារព័ត៌មាន The Nation បានឲ្យដឹងថា គណបក្សភឿថៃ ជាក្រុមប្រឆំាងធំបំផុត ដែលបាន​បង្កើតឡើងដោយអតីតនាយករដ្ឋមន្ត្រីលោក ថាក់ស៊ីន ស៊ីនណាវ៉ាត់ស្ថិតនៅលើចំណុចខ្ពស់។ ការស្ទង់មតិរបស់វិទ្យាស្ថាន NIDA ដែលបានស្ទង់មតិប្រជាជន២ពាន់នាក់ ចាប់ពីថ្ងៃទី៣ ដល់ថ្ងៃទី៧ ខែមេសា ហើយត្រូវបានចេញផ្សាយកាលពីថ្ងៃទី១៦ ខែមេសា បានរកឃើញថា៤៧,២ ភាគរយ គាំទ្រគណបក្សភឿថៃ ​បន្ទាប់មកគណបក្សអនាគតឆ្ពោះទៅមុខ មាន២១,២ភាគរយ។

គណបក្សទាំងពីនេះត្រូវបានគាំទ្រច្រើនបំផុតក្នុងការស្ទង់មតិកាលពីពេលមុន កាលពីខែមីនា ធ្វើឡើងវិទ្យាស្ថាន NIDA។

គោលនយោបាយប្រជាជននិយម ដែលអនុម័តដោយរដ្ឋាភិបាលគណបក្សភឿថៃ កាលពីពេលមុន ទទួល​ទាក់ទាញអ្នកបោះឆ្នោតភាគច្រើនសម្រាប់គណបក្សនេះ ជាពិសេសនៅភាគឦសាន​មានប្រជាពលរដ្ឋច្រើន ដែលទទួលបានប្រយោជន៍​ពី​ការ​ឧបត្ថម្ភ​ធនសម្រាប់កសិករ។

គណបក្សភឿថៃ កំពុងសន្យាជំរុញសេដ្ឋកិច្ច ​ដល់យ៉ាងហោចណាស់ ​៥ភាគរយ នៅឆ្នាំនីមួយៗ ជាសន្ទុះដ៏ខ្លាំងក្លាមួយដែលមិនអាចធ្វើឲ្យ សម្រេចបានដោយនាយករដ្ឋមន្ត្រីបច្ចុប្បន្នលោក ​Prayuth Chan-ocha អំឡុងពេល៩ឆ្នាំក្នុងការកាន់តំណែងរបស់លោក។