ភ្នំពេញ៖ មន្រ្តីជាន់ខ្ពស់នៃក្រសួងមហាផ្ទៃ បានថ្លែងឲ្យដឹងថា កាលពីឆ្នាំ២០២២កន្លងទៅនេះ សមត្ថកិច្ចបានធ្វើការឃាត់ខ្លួនជនសង្ស័យជាង២០នាក់ ពាក់ព័ន្ធនឹងការផលិត និងការជួញដូរផលិតផលក្លែងក្លាយបញ្ជូនទៅកាន់តុលាការ ខណៈផលិតផលក្លែងក្លាយជាង ៣០តោនត្រូវបានរឹបអូស និងដុត​កម្ទេច​ចោលជាបន្តបន្ទាប់។

ថ្លែងប្រាប់ទូរទស្សន៍BTV បន្ទាប់ពីបញ្ចប់កិច្ចប្រជុំត្រួតពិនិត្យលទ្ធផលការងារឆ្នាំ២០២២ និង​លើកទិសដៅឆាំ្ន២០២៣របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែល​បង្កគ្រោះថា្នក់មានហានិភ័យខ្ពស់ដល់សុខភាព ​និងសុវត្ថិភាពសង្គម ​នាព្រឹកថ្ងៃទី២៦ ខែមេសា ឆ្នាំ២០២៣នេះ ​ឯកឧត្តម មៀច សុផាន់ណា ​រដ្ឋលេខាធិការក្រសួងមហាផ្ទៃ និងជាប្រធាន​គណៈកម្មាធិការប្រយុទ្ធប្រឆាំង​ផលិតផលក្លែងក្លាយ បានឲ្យដឹងថា សមត្ថកិច្ច​បាន​ចុះបង្ក្រាបឱសថខុសច្បាប់ ផលិតផលវេជ្ជសាស្ដ្រ​ ផលិតផលគ្រឿងសម្អាង ផលិតផល​ឧបភោគបរិភោគ និងផលិតផលក្លែងក្លាយខុសច្បាប់ទូទៅ​បានជាង ​៣០តោន ក្នុងនោះ​ផលិតផលឧបភោគបរិភោគចំនួន ១៣តោន និងប៊ីចេងចំនួន១៨តោន។

ជាមួយគ្នានោះដែរ ឯកឧត្តម មៀច សុផាន់ណា ក៏បានប្រាប់ដល់ទូរទស្សន៍BTVផងដែរថា ផលិត ផល​ដែលត្រូវរឹបអូសបានកាលពីកន្លងទៅ ជាបន្តបន្ទាប់នេះគឺសុទ្ធតែមានហានិភ័យ​ខ្ពស់​ចំពោះអ្នកបរិភោគ និងអ្នកប្រើប្រាស់ ដោយវាអាច បង្ករគ្រោះថ្នាក់ដល់សុខភាពយ៉ាងធ្ងន់ធ្ងរ ដោយសារតែការធ្វើរបស់ពួកគេខុសពីស្តង់ដារ​ និងខ្លះទៀតហួស កាលបរិច្ឆេទ ដូចជាប្រហិត និងសាច់ចម្រុះជាដើម។

នៅក្នុងកិច្ចសម្ភាសន៍ជាមួយទូរទស្សន៍BTVផងដែរនោះ ឯកឧត្តម ប្រធាន គ.ប.ផ.ក. ក៏បានលើក ឡើងផងដែរថា ក្នុងពេលប្រតិបត្តិការចុះបង្រ្កាបដល់ទីតាំងផលិតផល​ក្លែងក្លាយទាំងនោះ ក្រុមការងារក៏បានជួបនូវឧបសគ្គមួយចំនួនផងដែរ ដោយទីតាំងខ្លះខ្វះ​ការសហការជាមួយ​និង​អាជ្ញាធរ និងខ្លះទៀតត្រូវបានអ្នកមានអំណាចមកកាង ប៉ុន្តែទោះជាយ៉ាងណា​ក៏ដោយ​ក្រុមការងារ​នៅតែបន្តធ្វើដើម្បី សុខភាព របស់បងប្អូនប្រជាពលរដ្ឋ ​និងដើម្បីសន្តិសុខជាតិ ខណៈផលិតផល​ក្លែងក្លាយទាំងនេះ ត្រូវបានអន្តរជាតិចាត់ទុកថា ជាបទឧក្រិដ្ឋឆ្លងដែនដ៏ធំនោះ៕អត្ថបទ៖ បាន ចក់