ភ្នំពេញ៖ នៅទីស្តីការក្រសួង កាលពីថ្ងៃទី២៧ ខែមេសា ឆ្នាំ២០២៣នេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានចូលរួមប្រជុំពិភាក្សាជាមួយ​លោក Gunther Beger នាយកគ្រប់គ្រង SDG ការច្នៃប្រឌិត ​និងការផ្លាស់ប្តូរសេដ្ឋកិច្ច នៃអង្គការ​សហប្រជាជាតិដើម្បីអភិវឌ្ឍន៍ឧស្សាហកម្ម (UNIDO)។

ប្រភពពីក្រសួងកសិកម្ម នៅក្រោយចប់ជំនួបនេះ បានឲ្យដឹងថា ក្នុងកិច្ចប្រជុំនេះ ​ឯកឧត្តមរដ្ឋមន្ត្រី បានលើកឡើងអំពីទិសដៅក្រសួងក្នុងការចង់សម្រេច​បាននូវសន្តិសុខស្បៀង និងមាននិរន្តរភាព​សេដ្ឋកិច្ច ដោយក្នុងនោះត្រូវពិនិត្យការប្រើប្រាស់ដីឱ្យមានតុល្យភាព ដើម្បីឱ្យកសិករអាច​បន្តការ​ដាំដុះ ទទួលបានចំណូល និងកើនប្រាក់ចំណេញ។

ក្នុងន័យនេះ កសិករត្រូវការបច្ចេកទេស បច្ចេកវិទ្យា ដើម្បីផលិតផលិតផលប្រកបដោយគុណ​ភាព​ស្តង់ដា សម្រាប់ផ្គត់ផ្គង់​តម្រូវទីផ្សារពេញមួយឆ្នាំ។

ឆ្លៀតក្នុងឱកាសនោះ ឯកឧត្តមរដ្ឋមន្ត្រី បានស្នើឱ្យយូនីដូ សហការ និងពិនិត្យលទ្ធភាពសិក្សា​លើ​ការងារនេះ រួមទាំងការពង្រឹងសមត្ថភាពមន្ទីរពិសោធន៍​ផងដែរ ព្រោះវាជាគោលដៅ​អាទិភាពមួយ​របស់ក្រសួង៕