ភ្នំពេញ៖ កម្ពុជា-ជប៉ុន ចុះហត្ថលេខាលើកិច្ចព្រមព្រៀងឥណទានសម្បទាន សម្រាប់គម្រោង​ស្តារឡើងវិញនូវប្រព័ន្ធស្រោចស្រព​ និងប្រព័ន្ធរំដោះទឹកភាគនិរតីរាជធានីភ្នំពេញ (កញ្ចប់ទី២) មានទឹកប្រាក់ចំនួនជាង ២,៤ពាន់លានយ៉េនជប៉ុន។

ឯកឧត្តម ហែម វណ្ណឌី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុង​ពិធី​ចុះហត្ថលេខាលើកិច្ចព្រមព្រៀងឥណទានសម្បទាន​ សម្រាប់គម្រោងស្តារឡើងវិញនូវប្រព័ន្ធ ជាមួយ លោក SANUI KAZUMASA ប្រធាននិងទីភ្នាក់ងារសហប្រតិបត្តិការអន្តរជាតិនៃប្រទេស​ជប៉ុន (JICA) នៅថ្ងៃទី ២៨ខែមេសា ឆ្នាំ២០២៣នេះថា ​នេះគឺជាឯកសារគតិយុត្តមួយទៀត បន្ទាប់ពី​ការចុះហត្ថលេខាលើលិខិតប្តូរសារ ​ស្តីពីការផ្តល់ឥណទានសម្បទាន ​សម្រាប់គម្រោងនេះ កាល​ពីថ្ងៃទី ១០ខែមេសា ឆ្នាំ ២០២៣ រវាងឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការ​បរទេស និងសហប្រតិបត្តិការអន្តរជាតិ និងឯកឧត្តម UENO Atsushi ឯកអគ្គរាជទូតវិសាមញ្ញ និងពេញសមត្ថភាពជប៉ុន ប្រចាំនៅព្រះរាជាណាចក្រកម្ពុជា។

គម្រោងស្តារឡើងវិញនូវប្រព័ន្ធស្រោចស្រព និងប្រព័ន្ធដោះទឹកភាគនិរតីរាជធានីភ្នំពេញ មាន​ទិសដៅកែលម្អ និងស្តារឡើងវិញនូវប្រព័ន្ធធារាសាស្ត្រដែលមានអនុគម្រោងចំនួន ២ រួមមាន៖ អនុគម្រោងប្រព័ន្ធធារាសាស្រ្តរលាំងជ្រៃ និងអនុគម្រោងប្រព័ន្ធធារាសាស្រ្តកណ្តាលស្ទឹង-បាទី ដែល​ការងារសាងសង់នេះ ស្ថិតនៅក្នុងខេត្តកំពង់ស្ពឺ, ខេត្តតាកែវ, និងខេត្តកណ្តាល ដែលមានផ្ទៃដី​ធារាសាស្រ្ត​សរុបប្រមាណ ២១ ពាន់ហិកតា និងផ្តល់គុណ​ប្រយោជន៍ដល់ប្រជាជន​ប្រមាណ​ជិត៨ពាន់ គ្រួសារ ដោយមានកសិករទទួលផលពីគម្រោងប្រមាណ ៤៤ ០០០ នាក់ តាមរយៈការផ្គត់ផ្គង់​ធនធានទឹកស្រោចស្រពឲ្យបានគ្រប់គ្រាន់ ដែលជួយឱ្យកសិករអាច​បង្កើនផលិតកម្មស្រូវបានពីចំនួនប្រមាណ ២,០៩ ទៅ ៣,៥០ តោន​ ក្នុងមួយហិចតា និងទៅ ៣,៥០ ទៅ ៥,០០ តោន ក្នុងមួយហិចតា។

ឯកឧត្តមរដ្ឋលេខាធិការ, ក្នុងនាមរាជរដ្ឋាភិបាលកម្ពុជា ក្រសួងសេដ្ឋកិច្ច និងហិរញ្ញវត្ថុ និង​ប្រជាជនកម្ពុជា បានថ្លែងអំណរគុណចំពោះរដ្ឋាភិបាលជប៉ុន ​និងប្រជាជនជប៉ុន គ្រប់ស្ថាប័ន​ពាក់ព័ន្ធរបស់រដ្ឋាភិបាលជប៉ុន ដែលតែងតែបានផ្តល់នូវកិច្ចសហប្រតិបត្តិការដ៏ល្អប្រសើរ ជាពិសេសទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ដែលបានបន្តផ្តល់​ហិរញ្ញប្បទាន សម្រាប់កិច្ចសហប្រតិបត្តិការអភិវឌ្ឍន៍ផ្លូវការ (ODA) ទាំងក្នុងក្របខ័ណ្ឌ​ហិរញ្ញប្បទានឥតសំណង, ឥណទានសម្បទាន ​និងជំនួយបច្ចេកទេស ដែលបាន​ឆ្លើយតបចំ​ទិសដៅអភិវឌ្ឍន៍របស់រាជរដ្ឋាភិបាលកម្ពុជា ក្នុងការស្តារ និង អភិវឌ្ឍន៍សង្គម-សេដ្ឋកិច្ច៕អត្ថបទ៖ សុន រ៉ាឌី