ប្រធានាធិបតីទួរគី លោក Recep Tayyip Erdogan បានប្រកាសថា កងកម្លាំងប្រទេសទួរគី បានសម្លាប់មេដឹកនាំក្រុមរដ្ឋអ៊ីស្លាមដែលសង្ស័យនៅក្នុងប្រទេសស៊ីរី។ លោក Abu Hussein al-Qurayshi ត្រូវបានគេនិយាយថា បានគ្រប់គ្រងក្រុមនេះបន្ទាប់ពីអ្នកគ្រប់គ្រងមុនត្រូវបាន សម្លាប់កាលពីសរទរដូវមុន។

លោក Erdogan បានប្រាប់ប្រព័ន្ធផ្សព្វផ្សាយ TRT របស់ទួរគី ថា មេដឹកនាំក្រុមរដ្ឋអ៊ីស្លាម ត្រូវបានសម្លាប់ ក្នុងប្រតិបត្តិការរបស់ទីភ្នាក់ងារចារកម្ម MIT របស់ទួរគី កាលពីថ្ងៃសៅរ៍។ រហូតមកដល់ពេលនេះ ក្រុមរដ្ឋអ៊ីស្លាម ពុំបានធ្វើការអត្ថាធិប្បាយណាមួយ លើ​ប្រតិបត្តិការដែលបានរាយការណ៍នេះទេ។

ប្រព័ន្ធផ្សព្វផ្សាយ BBC ពុំអាចផ្ទៀងផ្ទាត់ដោយឯករាជ្យ ចំពោះការអះអាងរបស់លោកប្រធានាធិបតី Erdogan ឡើយ។ លោក Erdogan និយាយថាទីភ្នាក់ងារចារកម្ម MIT បានតាមដានលោក Qurayshi ជាយូរមកហើយ ហើយយើងនឹងបន្តការប្រយុទ្ធរបស់យើងប្រឆាំងនឹងអង្គការភេរវកម្មមួយនេះ ដោយគ្មានការអត់ឱនណាមួយឡើយ។

ប្រភពព័ត៌មានពីប្រទេសស៊ីរី ដកស្រង់ដោយ​ ទីភ្នាក់ងារសារព័ត៌មានរ៉យទ័រ បានឲ្យដឹងថា ប្រតិបត្តិការបានធ្វើឡើងនៅទីក្រុង Jandaris ភាគខាងជើង ជិតព្រំដែនប្រទេសទួរគី។

កាលពីខែវិច្ឆិកា ក្រុមជីហាត បានប្រកាសពីការស្លាប់របស់មេដឹកនាំខ្លួន លោក the Abu al-Hassan al-Hashemi al-Qurayshi ។ សហរដ្ឋអាមេរិក បាននិយាយថា លោកត្រូវបានសម្លាប់​ក្នុង​ប្រតិបត្តិការដោយកងទ័ពស៊ីរីសេរីជា​ក្រុមឧទ្ទាម ​នៅប្រទេសស៊ីរីភាគនិរតី កាលពីពាក់កណ្តាលខែតុលា ឆ្នាំ២០២២។

នៅពេលក្រុមរដ្ឋអ៊ីស្លាម ​បានគ្រប់គ្រងដែនដី ៨៨.០០០គីឡូម៉ែត្រក្រឡា ដែលលាតសន្ធឹង​ពីប្រទេស៊ីរី ​ភាគឦសានដល់ប្រទេសអ៊ីរ៉ាក់ភាគខាងជើង ក្រុមនេះបានដាក់ច្បាប់​ដ៏ឃោរឃៅ លើប្រជាជនជិត៨លាននាក់។