​សេចក្តីស្នើច្បាប់​កាលពីពេល​ថ្មីៗ ដែល​ត្រូវ​បានអនុម័ត​ដោយ​រដ្ឋាភិបាល​ចក្រភព​អង់គ្លេស​ដើម្បី​ទប់ស្កាត់​ការឆ្លងកាត់​ព្រំដែន​ដោយ​ខុសច្បាប់ បាន​ជំរុញ​ឲ្យ​មានការ​រិះគន់​ជាច្រើន ខណៈ​ប្រទេស​នេះ​បិទផ្លូវ​អ្នកស្វែងរក​សិទ្ធ​ជ្រកកោន​ក្នុង​ចំនួន​ដ៏​ច្រើន​។ ទីក្រុង Calais ជាទី​ក្រុង​ឆ្នេរសមុទ្រ​នៅ​ប្រទេស​បារាំង​ភាគ​ពាយព្យ ក្លាយជា​កំពង់ផែ​សម្រាប់​ជនភៀសខ្លួន និង​ជនអន្តោប្រវេសន៍​ខុសច្បាប់ ដើម្បី​ធ្វើដំណើរ​ដោយ​នាវា​ចម្លង​ចូលទៅ​កាន់​ចក្រភព​អង់គ្លេស ជាការ​ឆ្លងកាត់​សមុទ្រ​ក្នុង​រយៈពេល​ជាង​២០​ឆ្នាំ​មកនេះ​។

​យោងតាម​អង្គការ L'Auberge des Migrants ជា​អង្គការក្រៅរដ្ឋាភិបាល​បារាំង បាន​ឲ្យ​ដឹងថា ជនអន្តោប្រវេសន៍​ភាគ​ច្រើន នៅក្នុង​ទីក្រុង Calais ត្រូវ​រស់នៅក្នុង​តង់​បង្កើតឡើង​ភ្លាមៗ ទោះបី​ជាមាន​ខ្យល់​ត្រជាក់​ក៏ដោយ ដោយ​សង្ឃឹមថានឹង​ទទួលបាន​ការតាំង​លំនៅ​ក្នុង​ចក្រភព​អង់គ្លេស​។ ទោះជា​យ៉ាងណា យោងតាម​សេចក្តីស្នើច្បាប់​ចុងក្រោយ​នេះ​ដែល​ត្រូវ​បានអនុម័ត​ដោយ​រដ្ឋាភិបាល​អង់គ្លេស ប្រជាជន​ទាំងអស់ ដែល​ចូលមក​ចក្រភព​អង់គ្លេស​តាមរយៈ​មធ្យោបាយ​ដែល​មិនត្រូវ​បានអនុញ្ញាត​នឹង​ត្រូវបាន​ហាមឃាត់​មិន​ឲ្យ​ស្នើសុំ​សិទ្ធ​ជ្រកកោន​ឡើយ​។ ពួកគេ​នឹង​ត្រូវបាន​ឃុំខ្លួន​ដោយ​រដ្ឋាភិបាល​អង់គ្លេស ហើយនឹង​ត្រូវ​និរទេស​ត្រឡប់​ទៅកាន់​ប្រទេស​របស់​ពួកគេ​វិញ ឬ​ផ្ទេរ​ទៅកាន់​ប្រទេស​ទី​៣ ដូចជា​ប្រទេស​រ្វ៉ា​ន់​ដា​ជា ដើម​។ ដោយមាន​គោលនយោបាយ​ថ្មី​នៅលើ​របៀបវារៈ អនាគត​នៃ​អ្នកស្វែងរក​សិទ្ធ​ជ្រកកោន​ក្នុង​ទីក្រុង Calais នឹង​ជួប​ភាពមិនច្បាស់លាស់​។​

​ទ្វីបអឺរ៉ុប តែងតែ​ជា​គោលដៅ​សំខាន់​សម្រាប់​អ្នកស្វែងរក​សិទ្ធ​ជ្រ​កោន​មកពី​តំបន់​ជួប​ភាពវឹកវរ​។ លំហូរ​នៃ​ក្រុម​ជនភៀសខ្លួន​ដ៏​ច្រើន​បានមក​កាន់​ទីក្រុង Calais ជា​រៀងរាល់ឆ្នាំ ដោយ​សង្ឃឹម​សម្រាប់​ឱកាស​ឆ្លងកាត់​សមុទ្រ​៕